Bilib ko sa lahutay sa Philippine Postal Corp. (PhlPost). Inay motahan nga naapsan na sa bag-ong mga teknolohiya sa komunikasyon ang ilang negosyo, padayon silang nangita og paagi aron nga makapadayon pag-alagad sa nag-usab-usab nga panginahanglan sa katawhan. Nanghinaot ang PhlPost nga kapugngan ang nag-ung-ong nga hingpit nga pagkabangkarota sa way pagsakripisyo sa ilang mandato paghatag sa publiko sa labing barato nga postal services pinaagi sa paglusad sa tulo ka bag-ong negosyo ubos sa payong nga "Juan Click":
•Personalized stamps;
•Pinoy e-mall; ug
•PhlPost Mobile App.
***
Klarong pagkabayo sa uso nga "selfie" ang personalized stamps nga ipamaligya sa photo booths sa nag-unang destinasyon sa mga turista sama sa Chocolate Hills sa Bohol, Boracay ug Underground River sa Palawan. Gipresyohan og P250, ang personalized stamps mahimong gamiton pagpada og mga suwat o isip handumanan lang.
Ambot may nakahunghong ba sa kadagkoan sa PhlPost nga ang ilang gikopya nga "selfie booths" gidugokan pag-ayo sa mga kasal, mga kombensiyon ug ubang espesyal nga mga okasyon kay libre. Ambot pila ray motakilid pagkuot og P250 nga mas maka-posing man sila, libre pang pagkuha og mga hulagway ug mas sayon ug mas dali pang mapada sa ilang mga higala o ma-upload sa Facebook ug ubang social media networks pinaagi sa ilang cellphones.
***
Mas dako ang kahigayonan sa paglampos sa laing duha ka bag-ong negosyo sa PhlPost, ang pag-apil nila sa e-commerce ug mobile apps. Kinahanglan hinuon nga ilang makuha ang pagsalig sa nag-usbaw nga gidaghanon sa mga nagnegosyo online pinaagi sa paglabaw sa nag-unang e-commerce providers; ingon man ang beneficiaries sa mga hinabang alang sa labing kabos nga mga pamilya pinaagi sa Department of Social Welfare and Development (DSWD) ug senior citizens gikan sa local government units (LGUs).
Masulub-ong balita alang sa PhlPost: Labing dako nilang bagahe mao ang pagkuha pagbalik sa pagsalig sa publiko nga hingpit nang nitalikod sa ahensiya pabor sa mas paspas, mas barato ug mas kasaligan nga mga alternatibo.
***
Nakadawat ko og suwat gikan sa tigpaminaw sa DYAB Abante Pa Bisaya! gikan sa Barangay Canduman nga silingan ra sa Barangay Jagobiao nga maoy nahimutangan sa ABS-CBN Complex sa Dakbayan sa Mandaue. Nakatag-an ka, naabtan og kapin sa semana ang PhlPost paghatod sa suwat sa among sibyaanan.
Kon wa magkadimao sa naandang tahas paghatod sa mga suwat, unsaon man pagkumbinser ang mga konsumidor nga takos silang moalagad online? Di kaha mangalisbo ang mga pagkaon ug ubang mohupas nga mga produkto? Di kaha mawagtang sama sa mga suwat ang mas matentalong financial assistance? Di kaha maayong mangandado na lang PhlPost inay padayong himuong gatasan sa kadagkoan nga nagpahimus og makabuhong nga mga benepisyo samtang gihikawan sa batakang suholan ang kasarangang mga kawani?
***
Email: leo_lastimosa@abs-cbn.com