Wa kinahanglana ni Presidente Noynoy Aquino ang kontrobersiya sa iyang pagtudlo og heneral sa kapolisan isip tagduma sa buhatan nga gitahasan pagbayad sa mga biktima sa martial law. Di siya kinahanglan nga makiglalis sa mga beterano sa pakigbisog batok sa diktadura ni Ferdinand Marcos.
Samtang way sukaranan ang pasangil nga wa magpakabana si Aquino pagpasidungog sa hut-ong sa mga aktibista nga dako og natabang sa iyang mga ginikanan ug sa iyang paghimuntog sa labing taas nga katungdanan sa nasudnong gobyerno, di sab malimod nga nagkasungi sila sa pipila ka haligi sa walhong mga pundok. Nga nisamot tungod sa paglawgaw sa pipila ka militante sa iyang matag lakang.
***
Kapanalipdan ni Presidente Aquino si Heneral Lina Sarmiento isip pangu sa Human Rights Victims' Claims Board. Gawas nga gipaluyohan ni Chairperson Etta Rosales sa Commission on Human Rights (CHR), nga di malalis nga usa sa labing nag-antos sa kuko sa balaod militar, maayo ang rekord sa serbisyo ni Lina, wa mahilambigit sa paglapas sa tawhanong katungod.
Sa taas niyang pangalagad sa Philippine National Police (PNP) daghan uyamot ang kahigayonan pagdukol sa ilang mga dinakpan, paglaktod sa balaod aron pagbadlong sa gikaintapan nga suspitsadong mga kriminal ug pagpahimus sa gahom. Nga wa siyay kaso sa pangabuso ug pangurakot labaw pa sa mga bituon sa abaga ni Sarmiento.
***
Mahimong kalutsan ni Sarmiento ang gitumbok nilang kanhi senador Joker Arroyo ug Rene Saguisag, suod nga mga alyado ni anhing Presidente Cory Aquino: Nga di kapasar si Sarmiento sa panginahanglan nga gitakda sa Human Rights Victims' Reparation and Recognition Act of 2013--ang kasuhito ug kalambigitan sa pagbatok sa pangabuso sa tawhanong katungod.
Bisan 21 anyos pa si Sarmiento sa paglibkas sa martial law niadtong 1981 ug 27 anyos pa sa paglayas ni Marcos niadtong 1986, makapasalipod siya sa argumento nga ang pagka-polis nakapahimutang niya sa labing maayong posisyon pagpatigbabaw sa mga tawhanong katungod. Gawas nga si Sarmiento di mag-inusara, daghan siya og kaubanan sa board.
***
Di angayng panalipdan ni Aquino ang pagtudlo niyang Sarmiento hangtod sa Korte Suprema. Ang pagkahimo ni Sarmiento nga labing unang babaye nga two star general sa PNP mahimong makatabang sa kawsa sa kababayen-an apan maoy labing dakong babag sa iyang pag-atiman sa mga biktima sa martial law.
Bisan unsa kamakiangayon ni Sarmiento pakiglambigit sa mga biktima, ang mga biktima mahimong maoy lain og tan-aw niya. Kabahin si Sarmiento sa kahugpongan nga kanunayng gikabangga sa mga aktibista, nga maoy agresibong namasangil nila nga mga samokan ug gipanggamit lang sa mga rebeldeng komunista. Makakita og mas tukmang katungdanan si Aquino alang ni Sarmiento. O mas maayong mohunong na sa nangalisbong bisyo pagpanudlo sa retiradong mga heneral sa bisan unsa na lang nga katungdanan.
***
Email: leo_lastimosa@abs-cbn.com