Mosamot pagbukal ang imong dugo samtang mag-untul-untol ang imong gisakyan sa gituyo-pagguba-apan-dugay-kaayong-naayo-pagbalik nga circumferential road sa usa ka bahin sa Isla sa Mactan ug samtang nagpaabot sa siyam-siyam una moabot ang imong turno sa pag-agi sa bisan-unsa-na-lang-alternatibong-agianan-nga-mahunahunaan-sa-kontraktor-bisan-sa-kanal-ug-sa-ngilit-sa-lawom-kaayong-bung-aw-sa-dan, o samtang nagbagulbol kay labihang gubaa sa imong sakyanan human nahagbong usa sa lawom nga mga lungag nga nataligam-an sa kontraktor, kon pahinumdoman sa pasalig sa Department of Public Works and Highways (DPWH) pagsugod sa trabaho niadtong Abril sa niaging tuig:
"Tungod sa P3.7 bilyones nga proyekto, mas mopaspas ang biyahe gikan sa Dakbayan sa Sugbo paingon sa Opon baleg 15 minutos."
***
Napugos ko og subay sa paglusad sa proyekto kay nakahinumdom ko nga si Presidente Noynoy Aquino ang nangunay pag-inugurar sa proyekto. Mas lisod tuohan nga nitugot lang ang DPWH nga usa sa gipanghambog nga proyekto ni Aquino mahimong usa ka dakong gahong sa pagpabaya, higanteng basakan sa pagpataka ug labing laksot nga pasundayag pag-insulto sa mabuot ug kugihan nga Sugbuanong mga magbubuhis.
Sa iyang diskurso sa inugurasyon sa proyekto, gitataw ni Aquino nga kon ang dakong kuwarta nga gi-usik-usikan sa overpriced nga decorative lampposts sa Asean Summit sa Sugbo gipalapad pa lang sa kadalanan sa Sugbo kadako unta sa namugna nga kaayuhan. Mahimong lisod nang labwan ang kawat sa summit apan morag lisod sang labwan ang kahasol nga namugna ning usa sa iyang proyekto sa Opon.
***
Ang 26 ka kilometro nga circumferential road nagsugod sa Barangay Pajo sa Opon ug mosangko sa Barangay Poblacion, latas sa lungsod sa Cordova. Gawas sa kadalanan palapdan sab ang tulo ka taytayan nga maagian--ang Gabi, Pilipog I ug Pilipog II.
Mahimong lima ka lanes ang usa ka kilometro nga bahin sa dan, duha ka kilometro ang mahimong four lanes ug ang nahibiling 23 ka kilometro two lanes.
***
Ambot may nakasulti na bang Presidente Aquino nga samtang nagkagrabe ang kalangay sa proyekto mas nabantang nga gibugalbugalan sa kontraktor ug DPWH ang iyang mga pasalig sa proyekto:
"Mas modaghan ang magbalikbalik nga mga turista tungod sa mas lapad nga kadalanan (ambot pila na ka lokal ug langyawng turista ang nikanselar sa ilang biyahe kay bakasyon ug di kalbaryo ang ilang tuyo);
"Mas modaghan ang mga negosyante nga mobubo sa ilang puhonan (ambot kinsay ganahan nga mobuhi og lab-as nga puhonan nga kinahanglan mang tilukon ang tanang pailob sa mga negosyante una makaabot sa ilang destinasyon sa Mactan, Marigondon, Maribago ug kasilinganang mga dapit); ug
"Mas mopaspas ang kalihokan sa mga produkto ug serbisyo sa Mactan Economic Zone (locators sa MEZ hagbay rang nagbagulbol sa binilyon ka pesos nga balor sa napilde nilang kahigayonan sa patigayon ug productivity sa ilang mga kawani).