Nagdali ang pasahero sa ayroplano pagpangita og taxi sa Mactan Cebu International Airport (MCIA). Kay nag-apas og biyahe sa barko paingon sa Leyte. Nilumbay siya sa taas kaayong linya nga paingon sa puti nga mga taxi. Pag-abot sa iyang turno mahinangpon niyang gidawat gikan sa guwardiya sa MCIA ang papel nga gilistahan sa ngan ug body number sa taxi.
Nakugang ang pasahero dihang gipaninglan gihapon siya sa taxi driver og P300, nga dako ra kaayo sa iyang naandang plitehan paingon sa pantalan. Dihang nireklamo, gipasabot siya sa drayber nga gikinahanglan ang patong kay dugay siyang naglinya sa sa tugpahanan una naka-pasahero.
***
Nahitabo ni alas-5 sa hapon niadtong Sabado. Usa ko sa nakadawat sa text sa iyang gidangatan. Gihatag dayon nakong text message ngadto sa labing kugihan namong dangpanan sa Land Transportation Office (LTO) Central Visayas nga taguon lang nato sa ngan nga Ronald Lim. Nipasalig si Ronald nga pahibaw-on mi niya kon madakpan na nilang taxi.
Tuod man, pasado alas-8 sa buntag sa Lunes, ni-text si Ronald nga nadakpan na nila ang taxi driver ug gitakda ang husay sa kaso sa alas-9 sa buntag sa Martes. Gipahibawo dayon nako ang pasahero sa paspas nga tubag sa LTO. Nagpasalamat ang biktima apan nipadayag og kasubo nga di makatambong sa husay.
***
Nabalhin na diay siya og trabaho sa kaulohan. Lunes ang unang adlaw sa iyang trabaho. Di siya makapananghid sa pagpalta sa ikaduhang adlaw pa lang sa trabaho tungod sa nahibilin niyang kaso sa Sugbo. Igo lang nireklamo aron nga makaamgo ang taxi drivers ug di na abusohan ang uban pang mga pasahero.
Masulub-on nakong gipahibawo si Ronald nga di makatambong sa husay ang complainant. Pinasikad sa nangaging kasinatian nga di mopakita ang biktima matabla ang kaso. Gani, bisan mopakita pa apan maluoy ang biktima sa hilak-hilak sa drayber, wa mapahamtang ang kinatibuk-an nga silot sa atraso--usa ka buwan nga suspenso sa lisensiya ug P500 nga multa.
***
Apan nalipay ko sa tubag ni Ronald. Ipadayon nila ang husay ug kon makumbinser nga may nahimong kalapasan multahan nila ang drayber sa overcharging ug patambungon og seminar sa LTO sa di pa iuli ang lisensiya. Matod ni Ronald kumbinsido sila sa katinuod sa reklamo kay ang biktima wa managana paghatag sa tibuok niyang ngan ug sa gitrabahoan nga kompaniya.
Maayo ning gipakita sa LTO nga kaisog batok sa mga abusado ug kamasinabuton sa mga biktima. Di hinuon angay nga mangiyugpos na lang ang umaabot nga mga mangreklamo. Kinahanglan nga motambong gyod sa husay nga ipatawag sa LTO kay batakang katungod ni bisan kinsang gipasanginlan ang pag-atubang sa namasangil niya. Ug hinaot nga inanay nang motagam ang mga drayber sa pagpanlubag.
***
Email: leo_lastimosa@abs-cbn.com