Usa sa gikumpisal ni Talisay City Mayor Soc Fernandez dihang nagkahinabi silang June Perez sa DYAB Radyo Patrol, pila ka takna human sa pagpuga ni Joavan Fernandez gikan sa selda saTalisay City Police Office, mao nga sa dakong bahin sa dul-an sa buwan nga pagpangita sa kapolisan sa iyang sinagop, si Joavan didto nagtago sa iyang bay sa Barangay Bulacao.
Nakadawat sa samang kasayuran ang hepe sa Talisay Police nga si Koronel Elmer Lim. Iyang gi-postehan og polis ang gate sa subdivision aron pagpaniid sa pagsud-gawas ni Joavan. Dihang nakit-an sa polis nga nag-motorsiklo si Joavan, nisunod dayong iyang kaubanan ug nasikop si Joavan niadtong Lunes sa gabii.
***
Atubangan sa sibaw nga mga pasangil nga kurog ang mga polis sa mayor, nipahibawo si Koronel Patrocinio Comendador, hepe sa Cebu Provincial Police Office, nga gitun-an karon sa ilang mga abogado may sukaranan ba ang pagpasaka og kaso batok ni Soc tungod sa pasangil nga nitabang siya pagtago ni Joavan.
Magamit ba sa kapolisan ang managsamang kasayuran nga nahipos nilang Koronel Lim, nga gikan sa mga Talisaynon nga nagpakabana kay gipul-an na sa panghasi ni Joavan, ug June Perez, nga gikan mismo ni Soc? Aron nga sa kataposan mapatubag na gyod si Soc sa way pupanagana niyang pagdupadupa ni Joavan sud sa daghan na uyamot nga katuigan?
***
Mubo nga tubag: Di. Si Soc, samtang nailhan sa iyang kasuhito sa tanang kapitulo ug bersikulo sa Bibliya, wa mabantog sa ka matinud-anon sa mga pung nga ilang giluwatan ngadto sa kapolisan ug sa media:
"Wa niya tumana ang saad nga isurender si Joavan ngadto sa kapolisan bisan napakita ni Koronel Lim ang iyang text nga nihimo sa pasalig; busa
"Di mapaabot nga iyang angkunon nga ipagamit batok sa iyang kaugalingon ang makadaot nga kasayuran nga, ambot tungod ba kaha sa kahingawa sa pagpuga ni Joavan, iyang naluwatan ngadtong June Perez?
***
Di makapadasig ang duha ka nagpadayong imbestigasyon sa posibleng kalapasan nga nahimo ni Soc:
"Ang lokal nga kapolisan wa igdungog nga isog nga mobarug batok sa mga pasangil sa dagkong politiko sama ni Fernandez nga, bisan sa kabadlungon ni Joavan, nagpabiling alyado sa partido sa administrasyon saTalisay; ug
"Ang Visayas Ombudsman nga niadto rang nag sige og pagarpar nga ilang giimbestigar ang karaang mga pasangil nga gipagamit ni Soc ang mga sakyanan sa gobyerno sa personal nga mga laag ni Joavan apan hangtod karon way ikapakita nga sangpotanan, kay si Deputy Ombudsman Pelagio Apostol gipasanginlan nga magkarakara lang kun mangisog nang bag-o niyang labaw nga si Ombudsman Conchita Carpio-Morales, o kun magpalaban na sa Malakanyang ang mga kihante nga gipul-an og paabot sa mga kaso nga iyang gipasagdan nga lawalawaan.
***
Email:leo_lastimosa@abs-cbn.com