Dako og tabang ang bag-ong mga teknolohiya sa pag-ila ug paghipos sa gipasanginlang mga responsable sa pagpamomba sa Boston Marathon: Gikan sa CCTV duol sa finish line nga nagpakita sa di kasarangang lihok sa managsuong Tamerlan Tsarnaev, 26, ug Dzhokhar Tsarnaev, 19; ngadto sa heat detecting device ug robot nga nitultol sa nahimutangan ni Dzhokhar nga nakaikyas human napatay si Tamerlan.
Ang kadaghan sa security cameras duol sa dapit nga gibombahan niadtong Lunes nakatabang sa Federal Bureau of Investigation (FBI) pag-ila sa mga Tsarnaev gikan sa kaliboan ka dagway nga nakita sa mga kamera sa wa pa, atol ug human sa pagpamomba.
***
Nahimong mas sayon ug mas luwas ang mga gimbuhaton sa kapolisan human nila na-engkuwentro ang managsuong Tsarnaev, salamat sa pagkatap sa ilang mga dagway sa kalibotanong media, upat ka adlaw human sa pagpamomba. Tungod sa pagdudang naghupot og daghang eksplosibo, robot maoy gipalihok sa kapolisan pagsusi sa sakyanan nga gibiyaan sa mga suspek.
Human nakadawat og kasayuran sa gitagoan sa ikaduhang suspek nga bangka nga gitabonan og tarp, nigamit ang kapolisan og thermal imaging camera nga gimontar sa usa ka helikopter pagtino kun tua pa ba siya. Dihang natino ang presensiya ni Dzhokhar, naproblema ang kapolisan pagtino unsa siya katakos sa pagsukol ug unsa kadaghan ang iyang armas.
***
Robot ang gipaduol sa bangka ug gipatukas sa tarp nga nagtabon ni Dzhokhar. Niulbo dayon ang pinusilay ug mga eksplosibo. Samaran si Dzhokhar ug naluya na sa kadaghan sa dugo nga nawa niya sukad sa unang hugna sa pinusilay sa niaging gabii. Tandugon ang iyang kahimtang dihang gida sa ospital.
Gipaningkamotan sa mga mananambal nga mabuhi siya. Nga mahinungdanon alang sa mga imbestigador. Aron pagtino unsay motibo sa pagpamomba, duna pa ba sila’y kaubanan nga mahimong magpasiugda og dugang pagpamomba ug kun may hinabang ba silang nakuha gikan sa gawas sa Estados Unidos.
***
Di hinuon lunlon nga modernong teknolohiya ang nakasulbad sa krimen. Ang mga panagway nga nakuha sa CCTV nahimong mas makahuloganon tungod sa testimoniya sa usa sa mga biktima, si Jeff Bauman, 27, nga nawad-an sa duha ka tiil, kinsa nakakita ni Tamerlan nga nibutang sa bag nga gisudlan sa bomba sa iyang tiilan.
Ang presensiya ni Dzhokhar sa bangka wa maggikan sa robot ni sa thermal imaging camera. Kun dili sa tag-iya sa bay nga nakakita og lama sa dugo paingon sa bangka. Pahinumdom nga di hingpit nga makadupa sa kaluwas sa mga polis ang bag-ong teknolohiya mao ang pagkapusil patay ni Police Officer Sean Collier nga unang nakatubag sa alarma sa Massachusetts Institute of Technology (MIT) nga naglambigit sa managsuong Tsarnaev.
***
Email: leo_lastimosa@abs-cbn.com