Nigara si Joavan Fernandez tungod sa pagtuo nga di siya masilotan. Nga bisan unsa pay iyang buhaton ug bisan kinsa pay iyang pasakitan, wa siyay tulubagon. Kay ang mga biktima moluom lang sa ilang gidangatan. O kon motiyabaw ug mokiha man maareglo ra sa iyang amahan.
Mao ni hinungdan nga hangtod karon wa pa kabutangi og kinutoban ang nagkataas nang listahan sa iyang mga binuang. Ambot tinuod bang pasangil nga molikoy siya kon makahithit og ilegal nga drugas ug gustong mahimo nga sentro sa atensiyon. Bisan unsa pay pabilo, ang kainutil sa balaod maoy nakapagara niya.
***
Si Joavan wa mag-inusara. Atong palibot napuno sa mga sama niya. Way pupanagana nga nilapas sa balaod tungod sa pagtuo nga di sila masakpan. O kon masakpan di sila masilotan. Sila ang mga opisyal nga naghupot sa labing tag-as nga katungdanan sa gobyerno. Nga kumbinsido nga ang ilang dakong gahom makapapas sa bisan unsang tulubagon sa bisan unsa nilang binuhatan.
Samtang nagpadayon ang init nga kampanya alang sa piniliay karong Mayo 13, naghupot sa samang papating ni Joavan ang labing hawod ug labing adunahan nga nanagan. Nagpatuyang sa pagpangyatak sa mga lagda sa makiangayong kampanya kay kahibawo silang sama sa nangaging mga piniliay di sila masilotan.
***
Wa masiloti si Joavan tungod sa dakong buslot sa sistema sa hustisya--wa isalikway, hinunoa gihatagan og mas dakong luna ang tingog ug influencia sa iyang amahan nga si Talisay City Mayor Soc Fernandez ngadto sa mga biktima, mga saksi ug bisan sa mga polis, mga piskal ug mga huwes.
Di masilotan ang mga sama ni Joavan ug ang mas dagkong sad-an tungod sa samang buslot--ang lokal nga kadagkoan sa Commission on Elections (Comelec) mahadlok pagtinuod pagpatuman sa mga lagda kay mahimo silang malabay sa Sulu kon ang ilang apikihon maoy makadaog sa piniliay ug makalingkod sa katungdanan.
***
Ang maayong balita mao nga matapakan sa katawhan kining dakong buslot sa umaabot nga piniliay. Kay pulos nagpapili ang protektor ni Joavan ug ang mga sama o mas sad-an pa niya. Pinaagi sa pagsalikway nila karong Mayo 13, mapamatud-an nga ang lungsod gyud diay ang tinuod nga hari bisan sa kabusluton sa sistema sa hustisya.
Mas dako hinuong buslot ug di hingpit nga matapakan sunod buwan. Apan kon tabangan ang ligdong nga mga piliunon, modako ang kahigayonan nga di na sila manghudlat ni manghaylo sa mga tagduma sa sistema sa hustisya. Pinaagi sa pagpapas sa labing daling panahon sa makalibat nga suburno--nga gitawag karon sa mga mayor ug mga gobernador nga financial assistance--ngadto sa mga polis, mga piskal, mga huwes ug mga guwardiya sa mga prisohan.
***
Email: leo_lastimosa@abs-cbn.com