Kaluoy ni Jun Lozada, ang bayani sa pagkabutyag sa NBN-ZTE scandal, usa sa labing dakong anomaliya nga gipasangil batok sa pamunoan ni kanhi presidente Gloria Arroyo. Nikanaog na si Arroyo sa Malakanyang apan wa pa mahuman ang pagpanggukod nga nahiagoman ni Lozada.
Tungod sa iyang pagbisto sa nangalisbo nga mga detalye sa multi bilyones pesos nga transaksiyon, gisuwayan pagdagit si Lozada, gihasi ang mga sakop sa iyang pamilya ug gikulban sa iyang kaldero. Karong si Presidente Noynoy Aquino nay nagduma sa Malakanyang, nganong wa pa man lung-i sa iyang mga kaatbang si Lozada?
***
Ato ning klaruhon. Di angay'ng manghilabot si Presidente Aquino sa kasong pagpangawkaw nga giatubang ni Lozada sa Sandiganbayan. Kay kon iya na lang sang duphan ang tanang kaatbang ni Arroyo nga gituohan gibutang-butangan og mga kaso sa korte, unsa may dangatan sa atong sistema sa hustisya?
Angayng manubag si Lozada sa pasangil nga anomaluso ang mga transaksiyon nga iyang gisudlan dihang mao pay tagduma sa Philippine Forest Corporation (Philforest). Apil sa gikatahong gihatagan ni Lozada og land lease contracts mao ang iyang igsuon, si Jose Orlando Lozada, ug ang Transforma Quinta Inc. nga girepresentahan ni Lozada ug sa iyang asawang si Maria Violeta.
***
Apan di sab angayng linug-lingogan ni Aquino ang gibutyag ni Lozada nga relasyon tali sa kihante ug sa usa sa labing gamhanang opisyal karon sa Malakanyang. Ang bugtong kihante ni Lozada nga si Erwin Santos maoy gitudlo ni Arroyo nga tagduma sa Philforest dihang gigukod na nila si Lozada. Si Santos bata-bata ni Lito Atienza, kanhi kalihim sa Department of Environment and Natural Resources (DENR) ug kanhi mayor sa Manila. Si Santos gidudahang gipaluyohan sa laing bata-bata ni Atienza, si Pacquito “Jojo†Ochoa Jr., executive secretary ni Aquino ug kanhi administrador sa Manila City Hall sa pamunoan ni Atienza.
***
Nagpabilin si Santos sa Philforest di tungod ni Atienza, nga hagbay rang nawagtang sa gahom. May sukaranan ang pagduda ni Lozada nga si Ochoa karoy nanalipod ni Santos maong wa matangtang sa pag-asumir ni Aquino niadtong 2010. Usa ba ni sa mga palusot sa mga sinaligan ni Aquino nga, tungod sa ilang kasuod niya, wa niya tarunga pagsusi?
Dihang nisibaw ang mga huhungihong nga giyak-an ni Ochoa ang kaso batok ni suspended governor Gwen Garcia, gikatahong giapura ni Aquino si Ochoa pagsubli sa rekomendasyon ni anhing DILG Secretary Jesse Robredo ug kon may igong sukaranan pagpirma dayon sa suspension order ni Garcia.
Nangampanya na si Aquino batok sa mga kandidato ni Bise Presidente Jejomar Binay, nga giingong maoy amo ni Ochoa. Tugotan ba lang gihapon si Ochoa nga mosabotahe sa iyang pamunoan?
***
Email: leo_lastimosa@abs-cbn.com.