Kon wala ka pa mabiktima niining mga badlongon sa katilingban, tingali moapil ka sa mga tawo nga kusog kaayo nga mosaway kon adunay pangpusilon nga mga kriminal.
Apan lahi na tingali ang sitwasyon kon ikaw mismo ang mabiktima niining maong mga badlongon sa katilingban.
Unsa kaha'y inyong sentimento kon ang kabahin sa imong “loan†sa Pag-IBIG kawaton lang human lungkaba sa kawatan ang imong balay? Nahitabo kini kanako.
Malipay kaha ka kon ikaw mangumpra diha sa department store unya pagtan-aw nimo sa imong pitaka sulod sa bag wala na kay gikuot?
Ang akong kumpare nga bodyguard ug iladong tawo dinhi sa Sugbo igo lang mibiya makadiyot ug giparking ang iyang motorsiklo kaniadtong Nobyimbre, pagbalik niya gilungkab na ug nakuha ang duha niya ka armas sa U-box.
Si Cebu City Health Officer Stella Ygoña misulod sa dakong tindahan diha sa dalan Colon kay namili og bag, wala siya makabantay nga gikuot na ang iyang iPad nga gisulod sa iyang bag.
Dunay kawani sa hukmanan misulod sa laing dakung tindahan diha sa Colon nakuotan usab sa iyang pitaka nga may sulod nga kapin sa P3,000.
Ang kasinatian sa akong kapikas maoy mas grabe kay kapin sa P50,000 ang nakuha sa mga mangungu-ot gikan sa iyang bag dihang misulod siya sa department store sa Colon.
Nasayran nako gikan sa mga tawo nga mangilis og “PO†diha sa gawas sa maong tindahan nga ang modus diay niining mga mangungu-ot mao nga moatake sila kon daghan ang mga tawo sa tindahan.
Kon dili daghan ang tawo ug dili sila makahigayon pagkuot didto sa sulod, ilang sundan ang buot nila biktimahon ug panid-an nila diin gibutang ang pitaka o kwarta.
Dako kining hagit sa tagdumala niining duha ka dakong tindahan sa Colon nga dugangan ninyo ang inyong “private detective†ug dili kay ang bantayan nila mao ra ang inyong baligya kon dili kinahanglang apilon nila pagbantay ang mga customer.
Unya kamong mga polis nga sakop sa Theft and Robbery Section (TRS) hagiton ko kamo nga himoi ninyo og operation kining mga tawhana. Sayon ra kaayo sila ilhon kay bisan ang mga tigpangilis og “PO†diha nakaila kanila.
Sayud ko nga kamo nakaila usab niining maong mga mangungu-ot apan pulpol lang kaayo mo mohimo og follow-up. Bag-o na man diay ang hepe sa TRS, hagiton nako si Supt. Andres Bayarcal nga ikaw na'y mahibawo unsaon nimo kining mga badlongon sir.
Kon ako'y pagbut-on, isulod sila sa lungon.
***
Daygon nako si Raquel Arce kay mora'g sa akong tan-aw nadisiplina niya ang mga tindera, ilabi na ang mga naninda og imahen sa mga santos luyo sa Basilica del Santo Niño.
Babaye tuod kini si Raquel apan gilupig niya sa abilidad ang mga nangagi nga hepe sa SPEED (City Hall demolition team) nga mga lalaki.
Ang uban kanila gidungog nga mao diay nga walay maayong serbisyo kay nagdawat man diay og suborno gikan sa mga tindera aron dili sila hilabtan.
Alang nako, daghan pa kaayo nga angay'ng himoon si Raquel. Daghang aseras nga gialihan og mga water dispenser ug ubang baligya nga dili na hinoon makaagi ang mga tawo.
Angay unta nga mandoan kanunay ni Mayor Michael Rama si Raquel nga ipatuman g'yud kanunay ang iyang “slogan†nga “Hapsayon ang Gubot†ug “Tul-iron ang Hiwi.â€
Nasayud ko nga daghan ang masakitan kon estrikto nga ipatuman sa mga sakop ni Raquel ang balaud, apan unsaon man, mao man kini ang balaod?
Isip mayor sa dakbayan, kinahanglang dili magpanuko si Mayor Rama sa paghimo sa kamandoan ngadto ni Raquel nga hapsayon ang mga aseras nga giukopahan karon sa mga tindera ug kalimtan niya nga panahon karon sa eleksyon.
Tinuod, panginabuhi kana sa maong mga tawo apan unsa may hitsura sa atong dakbayan kon ato sila'ng pasagdan? Tan-awa ra gud ang T. Padilla gikan sa eskena Sikatuna, kaniadto luag kaayo ang aseras diha, karon hain na man ang aseras?
Resulta kini sa pulpol nga mga hepe sa SPEED kaniadto nga kangkang lang ang kamot nga modawat sa sweldo ug walay maayong serbisyo.