Palainom nga bana

Dear Tito Miguel,

Ako diay si Ms. C ,  taga Daanbantayan ,usa ka minyo.Mangayo lang ko tambag Tito. Aron mahapsay ni akong huna- huna. Akong bana Tito kay   nagtrabaho sa Cebu  City,  niya dili ko mosugot nga mag- inom inom  siya sa gawas kay kahibaw ko nga anha magsugod ang tanan sa inom. Mao gud na amo lalisan usahay basta magtuman siya. Niya kay naa man gud usahay masangit man gud sa inom ,lalis nasad mi. Naa pay panahon i-off niya iya cellphone basta  mag -inom, ang  rason niya aron di kuno ko makahibaw nga nag inom siya ,sakto diay na Tito? Ako unta nga punto nga  dili nako siya tugtan,ug  para raman unta na sa amoa. Mangayo lang gyud ko tambag nimo ,unsa akong buhaton?. Thank you and  God bless.  —Ms. C

* * *

Ms. C,

Insakto ka, ang inom makapakursunada sa pamabaye. Pero’g mabudhion gyud imong bana, dili na mistil moinom pa. Sa laktod, maski unsaon nimo og pugong ug bantay, mangita gyud siya’g lain. Busa ayaw na hago-a imong hunahuna’g kasingkasing, salig na lang maski sa imong tan-aw dili siya kasaligan. Wala ka’y lain mabuhat. Wala ka sa iyang kiliran mata’g karon ug unya. Ikaw ang alkanse, nagdako imong hunahuna apan basin diay walay gibuhat imong bana. Kun di gyud ka mahimutang, mahimo nimo kuhaan iyang pag-inom, apan ayaw ihikaw tanan.

Sugti, puede ra ini’g weekend o kun duna’y okasyon, aron sab siya malingaw ug makapahuway sa pressure sa trabaho. Kun imo ihikaw tanan, sigurado magkisi-kisi gihapon. Ikaw ra’y ilaron. Gani, pagngan na ka’g cell phone aron lang dili nimo siya ma-monitor.  Mahimo sab nimo siya agnihon ug kuyogan magpa check-up sa doctor. Lagmit sa iyang bisyo duna na siya’y problema sa kahimsog. Sigurado nga ipalikay siya sa doctor sa pag-inom aron siya baskog ug himsog. Lagmit mahadlok siya labi na’g warningan sa doktor nga posible siya ma- stroke kun dili mobiya sa bisyo.

Sa maong paagi, doktor na ang nagdumili niya pag-inom, dili pa ikaw nga asawa nga madudahon. Kun duna mo’y mga anak, ipabadlong nila, labi na sa babaye nga anak. Kasagaran amahan ganahan badlongon sa anak nga babaye. Ka’y kun ikaw nga adlaw adlaw namadlong, di na ka tuohan. Kadtong panagsa ra motingog mao’y makabungog. —Tito Miguel

Magpatambag ka? Ipada kang Tito Miguel: 0991-318-9366