Unya nagbayloay sila si Rey ug iyang mga sakop sa ilang mga hunahuna.
Hangtod nga nakapondar sila’g usa ka maayong plano unsaon pagsikop sa mga tawong daotan sa maong dapit. Usa ka pino nga paagi ang ilang nakab-ot nga sa ilang pagtuo, dili gayod maka-eskapo kanila ang mga sakop sa sindikato.
Ug niana dayong pagkagabii, gihimo nila ang plano. Duha ka dyip ang ilang gisakyan. Nangadto sila sa lungsod sa Talisay. Igo gayod nga mihalok sa alas siyete ang taknaan sa ilang pag-abot. Nanghunong sila sa usa ka dapit diin medyo talagsa ang kabalayan. Ilang gitagoan ang duha ka sakyanan sa ilawom sa kalubihan.
Gikan sa ilang gikanaugan, nanglakaw ang mga polis subay sa gamay’ng dalan-dalan nga milagbas ngadto sa usa ka beach resort nga gipanag-iya sa usa ka bahandianong magpapatigayon sa lungsod sa Talisay. Ang maong beach resort mao ang gi-report sa intelligence nga dapit nga dunggoan sa lantsa nga gikargahan sa mga kontrabando.
Wala dangti’g dugay, napadul-an na nila ang beach resort. Gisirkulohan nila ang tibuok lugar. Nag-amping sila sa ilang mga lihok nga dili mamatikdan sa mga guwardiya sa beach resort.
Mingaw ug ngitngit ang maong dapit. Wala’y bisan usa ka suga nga gipasiga. Nagngiob ang mga cottage. Mora’g wala gayo’y tawo. -- Sumpayan pa