Hard lockdown sa Alaska-Mambaling

CEBU, Philippines — Mas pahugtan pa karon ang pagpatuman sa lockdown sa mga sitio sa Barangay Mambaling sa Dakbayan sa Sugbo nunot sa mga kaso sa coronavirus (COVID)-19 sa maong lugar sumala pa sa tigpamaba sa mayor.

Si Attorney Rey Gealon sa virtual presscon kagahapong adlawa miingon nga ang tibuok Sitio Alaska sa maong barangay diin daghan ang kaso sa maong virus gi-lockdown sugod pa niadtong Mayo 6.

Dugangan pa ang mga polis nga pabantayon sa dapit human daghang mga reports nga aduna pay daghang mga residente ang wala motuman sa lockdown guidelines.

“Kaning nahitabo sa Barangay Mambaling i-hard lockdown mao ubos sa mga lagda sa Inter-Agency Task Force... nakahisgot og hard lockdown apan siguro mao ang dugang tropa sa kapulisan ang ibutang sa maong area para makamentinar sa ka-higpit, ug ka-hapsay, ug kalinaw kay dunay pa gyud ubay-ubay ka mga badlongon diha dapita sa Sitio Alaska,” matud pang Gealon.

Duna nay mga polis nga nagpalibot sa maong dapit ilabi na kadtong duol sa taytayan diin daghang mga nagpuyo ang nakita nga maglangoylangoy gihapon bisan gidid-an sila paggawas sa balay.

“It is a lockdown na gipahugtan, gipalig-onan dira nga area. Kay way lain tumong ug tinguha ang mayor na atong mga igsoon dira sa Sitio Alaska ug ubang sitio sa Mambaling na maluwas sa sakit dili magtakod-takod, wala’y daghan manggawas, magtapok, mag kiat mao naa ang mga miyembro sa kapulisan na mubadlong nila,” dugang pa ni Gealon.

Subli niyang gipahimangnoan ang publiko nga sundon ang gimando sa Executive Orders ni Mayor Edgardo Labella nga magsuot kanunay og face mask, social distancing, dili magtapok-tapok ug magpuyo sa balay.

Ang Sitio Alaska adunay 22 mil ka mga residente. Base sa talaan ang maong barangay adunay 629 ka kompirmadong kaso sa COVID-19 ug kinadaghanan kini sa tanang barangay sa dakbayan. The Freeman/IBM