Mamugnaong taming
Ang Nuog
Tinagik ni Jesson J. Morata
Dibuho ni Ramon Taguchi
Dili ma abi-abi sa akong handurawan,
Kun unsa kaha ang dangatan,
Sa atong inadlaw-adlaw nga patigayon,
Kon walay nuog nga ipahid nga gamiton.
Nagkadaiya ang matang sa nuog,
May gagmay, may dagko,
May lingin, may kuwadrado,
May mahal, may barato.
Adunay sapnot, adunay hamis,
Ug dili gani ikalalis,
Nagkalain-laing matang sa panapton,
Ikapahid ra gyud ang bugtong tumong.
Sa talad, linkoranan o bisan unsang kahimanan,
Ipahid ang nuog aron malimpiyohan,
Batok sa mga abog, lama ug hugaw,
Aron malimpyo, mohamis ug mosinaw.
Mamahimong ipahid sa sakyanan,
Ihidhid sa sawug nga sa tubig gibanawan,
Bisan unsang gamit sa patigayon ug kabalayan,
Usa sa mga halangdong butang.
Bisan gipakawalay bili sa uban,
Ang nuog dili nato igwaysapayan,
Pagsugod pa lang sa kapanahonan,
Kabahin na sa atong buhilaman.
- Latest
