Tulo ka semana sa wa pa modeklarar si Presidente Rodrigo Duterte nga supak siya sa pagtukod og casino sa Boracay, gihatagan sa iyang tinudlo nga si Andrea Domingo, chairwoman ug chief executive officer sa Philippine Amusement and Gaming Corporation, og lisensiya ang $550 milyones nga integrated casino resort sa isla.
Sa di pa manghunaw ang Malakanyang sa lakang ni Domingo, nangangkon si Francis Lui Yiu Tung, vice chairman sa Galaxy Entertainment Group (GEG) sa Macau, nga natuki na ang proyekto atol sa tigom sa kadagkoan sa kompaniya uban ni Presidente Duterte sa Malakanyang niadtong Disyembre 6.
***
Sa di pa ipanghimakak sa Malakanyang ang tigom, niang listahan sa mga nanambong: Galaxy Chairman Lui Che Woo, nga giilang ikaunom nga labing adunahan nga negosyante sa Hong Kong, Galaxy president Michael Victor Mecca, Senior Director for Strategic Planning Roland To Chi Kay, Senior Director for International Premium and Mass Market Development Raymond Yap Yin Min, Senior Manager Andrew Nicolas Lui ug Asian Infrastructure Investment Bank Director Rolando Macasaet.
Nitambong sab si Kongresista Alfredo Benitez sa Negros Occidental nga mao'y nagtukod sa Leisure and Resorts World Corp. (LRWC), local partner sa GEG, Tourism Secretary Wanda Teo, Socio-Economic Planning Secretary Ernesto Pernia, ug si Domingo.
***
Ang kahingpit na sa mga pangandam sa casino momatuod nga dugay na ning gihikay:
•Napalit nang 23 ka ektarya nga luna sa Barangay Manoc-Manoc;
•Gipahibawo sa GEG nga magsugod ang pagtukod sa casino sa 2019, inig abli og balik sa Boracay, ug mahingpit sa 2022; ug
•Uban ang malambuong relasyon sa Pilipinas ug China, gisabot na sa GEG ang mga suki sa uban nilang sugalan sa Macau.
***
Ang pasalig ni Presidente Duterte nga ibalik ang pagduma sa Boracay sa mga Pilipinhon dasonan sa higanteng mga proyekto human sa pagtak-op sa isla:
•Magtukod og taytayan nga mosumpay sa Boracay ug Caticlan ang Pilipinhon nga si Ramon Ang;
•Magtukod og higanteng drainage system sa Boracay ang laing Pilipinhon nga si Lucio Tan; ug
•Magtukod sa kinadak-ang hotel nga may 1,001 ka kuwarto ang mga Pilipinhon nga silang Edgar "Injap" Sia II sa Mang Inasal ug Tony Tan Caktiong sa Jollibee.