Illegal nga nag-refill og LPG Gironda
CEBU, Philippines — Usa ka 49-anyos nga lalaki ang gidakop sa mga otoridad tungod sa ilegal nga operasyon sa pag-refill og liquefied petroleum gas (LPG) atol sa entrapment operation sa Barangay Cubacub, Dakbayan sa Mandaue, Martes sa gabii, Hulyo 28.
Giila sa Criminal Investigation and Detection Group (CIDG) Regional Field Unit 7 ang suspek nga si alyas "Rey" residente sa Barangay Tingub, Mandaue City.
Ang operasyon, nga gitawag og "Oplan LIRA," gipahigayon mga alas-8:20 sa gabii sa CIDG Mandaue City Field Unit uban sa Police Station 6 sa Mandaue City Police Office ug mga representante sa Republic Gas Corporation (REGASCO).
Sumala pa sa CIDG-7, nakadawat sila og reklamo gikan sa REGASCO nga nipasangil sa suspek nga nag-refill sa ilang produkto nga walay otorisasyon sa ila.
Atol sa entrapment operation naaktohan siyang nibaligya og usa ka 11-kilogram nga REGASCO LPG cylinder.
Nadiskubrehan sa mga operatiba ang usa ka improvised LPG refilling station nga adunay daghang LPG cylinders nga nagdala sa nagkalain-laing rehistradong brand. Way napakitang permits ang suspek gikan sa mga tag-iya sa LPG brands, ug sa Deparment of Energy lakip na sa REGASCO nga nagtugot kaniya sa pag-refill sa mga cylinder.
Kasong paglapas sa Sections 2 ug 3 sa Republic Act No. 5700 ug Republic Act No. 8293 ang ipasaka batok sa suspek. Narekober usab sa mga operatiba ang P1,200 nga marked money nga gigamit sa operasyon. Sa kinatibuk-an, 54 ka LPG cylinders nga gibanabanang nagkantidad og P275,000. (BANAT NEWS)
- Latest
