Fake modeling scammer nadakpan

CEBU, Philippines — Nagpasidaan ang Regional Anti-Cybercrime Unit-Central Visayas (RACU-7) sa publiko, ilabina sa mga batan-ong babaye, batok sa mga pekeng modeling offers aron makakuha og sensitibong personal nga impormasyon ug pribadong hulagway.

Kini human usa ka lalaking nalutsan og warrant of arrest sa Regional Trial Court sa Naga City, Cebu tungod sa online extortion o pagpangilkil.

Ang suspek nga giila lang sa ngalang Kent ,22,  gireklamo sa usa ka 19-anyos nga model-beauty queen nga taga City of Naga, Cebu human kini gisigehan og kilkil bisag nakahatag na ni og sobra na sa P30,000.

Sa gihimong imbestigasyon nasuta nga taga Manila ang suspek  ug didto siya nadakpan ug gidala balik dinhi sa Cebu atong Hulyo 22, 2026.

Matud pa sa uyoan sa biktima, ang suspetsado naa pay laing pending nga mga kaso nga ipasaka sa biktima ug sa uban pang mga biktima.

Si RACU-7 chief PCOL Christopher Luyun nga base sa ilang imbestigasyon, nagpakaaron-ingnon ang suspetsado nga adunay modeling opportunities aron makakuha sa pagsalig sa iyang mga target.

Matud niya mangayo dayon ang suspetsado og personal nga impormasyon, lakip ang iCloud account details sa mga biktima.

Human makuha ang pribadong mga litrato ug video nga gitipigan sa account, hulgaon ang mga biktima nga ipakatap ang maong mga file pinaagi sa Telegram kon dili sila mohatag og kuwarta.

Padayon pa ang imbestigasyon sa RACU-7 aron mahibal-an kon adunay ubang mga biktima nga nalambigit sa maong giingong online blackmail scheme. (BANAT NEWS)