Gipusposa’g bara de kabra sa karibal

CEBU, Philippines — Usa ka 34-anyos nga construction worker ang nadakpan sa kapulisan human gipasanginlan nga namuspos og steel crowbar o "bara de kabra" sa usa ka 62-anyos nga lalaki atol sa usa ka kalingawan sa Sitio Bagacay, Barangay Catarman, Liloan, Lunes sa kadlawon Hulyo 20.

Ang biktima giila nga si alyas "Jesus", 62, residente sa maong lugar. Samtangang  suspetsado mao si alyas "Jomar" , 34 residente sa Purok Sitaw, Sitio Bagacay.

Base sa imbestigasyon sa Liloan Municipal Police Station, nahitabo ang insidente alas-1:30 sa kadlawon samtang nagtambong ang biktima sa kalingawan (disco). Sigon sa biktima nga kalit siyang giduol sa suspetsado ug gipusposan og bara de kabra tungod nagselos kini kay magkaribal silang duha sa pagpanguyab sa usa ka babaye.

Nasagang pa sa duha ka kamot sa biktima ang unang pagbunal apan gipusposan siya og balik ug naigo ang ubos nga bahin sa iyang mata. Nasamad sab iyang likod kay giguyod siya sa suspetsado.

Ang mga barangay tanod dali nga nidakop sa suspetsado ug gidala dayon ngadto sa Liloan Municipal Police Station.

Gitambagan ang biktima nga magpa-kurasyon para mapasakaan og kaso ang suspek. (BANAT NEWS)