Archival niawhag sa pagpadali og tukod sa CCLEX-CSCR interchange

CEBU, Philippines — Giawhag ni Cebu City Mayor Nestor Archival, Sr. ang Cebu–Cordova Link Expressway (CCLEX) Bridge Management Board nga dalion ang pagtukod sa P4.2-billion nga CCLEX–Cebu South Coastal Road (CSCR) interchange aron moloag ang kahuot sa trapiko diha sa South Road Properties (SRP) ilabi na sa pag-abli sa SM Arena ug uban pa’ng mga establisemento diha sa maong lugar.

Ang panawagan ni Archival nga alang sa dinaliang aksyon maoy naghatag og direksyon sa ikaduhang regular nga tigom sa board sa nilabay’ng semana diha sa opisina sa CCLEC sa Lungsod sa Cordova.

Gipangulohan ni CCLEC President ug General Manager Engr. Allan Alfon ang maong tigom ug gitambongan nila ni Archival ug Cordova Mayor Cesar Suan.

Nasentro sa session ang interchange project alang sa dinaliang kasulbaran sa kahuot sa trapiko diha sa SRP.

Ubos sa maong proyekto ang kaugmaran sa mga rampa nga direkta nga agianan paingon ug gikan sa CCLEX ug CSCR nga maghatag sa mga motorista gikan sa Mactan ug sa airport og mas paspas nga rota paingon sa Metro Cebu nga dili na kinahanglan moagi pa sa SRP ug sa SM complex.

Alang sa trapiko sa siyudad, ang viaduct maghatag og direktang koneksiyon gikan sa Guadalupe ug uban pa’ng mga lugar paingon sa CCLEX nga makapamubo sa kasamtangang walo ka kilometro nga detour.

Sa iyang State of the City Address, gihulagway ni Archival ang inadlaw-adlaw nga kalisdanan nga giatubang sa mga motorista.

Nahinumduman ni Archival nga ang CCLEX nakahimo na kaniadto og plano alang sa rampa padulong sa Pasil ug V. Rama Avenue panahon ni kanhi mayor Michael Rama, apan moresulta kini sa pagbalhin sa 400 ngadto sa 500 ka pamilya nga maapektohan.

Gipasabot ni Archival nga ubos sa bag-ong plano kong paingon ngadto sa Guadalupe dili na kini moadto sa SM mosaka na kini sa exchange, mokanaog sa viaduct paingon sa Guadalupe samtang gikan sa Guadalupe o bisan asa nga parte sa siyudad mosulod kini sa viaduct paingon sa exchange lahos sa CCLEX ug paingon sa airport.

Gipadayag sa CCLEX nga ang kaugmaran gikatakda kining sugdan sa sunod tuig diin target nga mahuman kini sa Disyembre 2028. — /BDB (BANAT NEWS)