Balay Silangan gibuksan sa siyudad sa Lapu-Lapu

CEBU, Philippines — Pormal nga gibuksan sa siyudad sa Lapu-Lapu ang Balay Silangan Drug Reformation Center sa Olango Island kagahapon, Hulyo 18, aron mahimong pasilidad alang sa community-based rehabilitation sa mga kwalipikadong indibidwal nga nalambigit sa paggamit og ilegal nga drugas.

Gitambongan ang inagurasyon ni Mayor Ma. Cynthia “Cindi” King-Chan, Kongresista Junard “Ahong” Chan, mga konsehal nga sila Emilio Galaroza Jr. ug Annabeth Cuizon, Lapu-Lapu City Police Office Director PCol. Agosto Daskeo, CLOSAP Head Garry Lao, mga opisyal sa Philippine Drug Enforcement Agency (PDEA), mga miyembro sa City Anti-Drug Abuse Council (CADAC), ug mga kapitan sa barangay sa Olango Island. Matud sa city government, ang maong pasilidad modawat sa mga kwalipikadong plea bargainers ug uban pang mahimong kabahin sa community-based rehabilitation program ubos sa mga kasamtangang polisiya batok sa ilegal nga drogas.

Lakip sa mga serbisyo nga ihatag sa sentro mao ang counseling, values formation, psychosocial support, skills training, ug mga livelihood program aron matabangan ang mga partisipante nga makabangon gikan sa pagdepende sa droga ug makabalik sa komunidad.

Sa iyang pakigpulong, giingon ni King-Chan nga ang kalampusan sa maong programa dili masukod sa pag-abli lamang sa pasilidad kondili sa positibong kausaban nga madala niini sa kinabuhi sa mga benepisyaryo.

“Public service is measured not only by the programs we begin, but by the lives we are able to influence over time. I hope that Balay Silangan becomes a place where individuals are encouraged to accept responsibility, restore their confidence, strengthen family relationships, and prepare for meaningful participation in society,” matud ni King-Chan. Ang pag-abli sa Balay Silangan misunod sa pagdawat sa Lapu-Lapu City Government og P5 milyones nga grant gikan sa Dangerous Drugs Board (DDB) niadtong Hunyo 30.

Giturn-over ang maong pundo ni DDB Chairperson ug Secretary Oscar F. Valenzuela aron suportahan ang pagtukod, pagpalapad, ug operasyon sa sentro.

Ang Balay Silangan usa ka community-based drug reformation program nga nagtumong sa rehabilitasyon sa mga low-risk drug offenders pinaagi sa counseling, values formation, ug mga programa sa panginabuhian aron mapalig-on ang ilang pagbalik sa katilingban. (BANAT NEWS)