Fireworks display gidili sa mga residential area, hospital

CEBU, Philippines — Si Cebu City Mayor Raymond Alvin Garcia niluwat og executive order nga nagmando nga ginadili ang makapahigayon og fireworks display duol sa residential area, pribadong dapit o duol sa ospital.

Ang fireworks display anha lang ipahigayon sa pampublikong lugar gumikan kay gilangkuban kini sa eksplosibo, makasunog ug uban pang pyrotechnic device nga padayon ug sunod-sunod nga gipasiga aron makamugna ug kolor nga mga suga, aso, ug kasaba alang sa kalingawan.

Ang tugotan nga mapahigayon og fireworks display mao ang nakabaton og special permit.

Dili usab tanan ang mamahimong mobaligya ug fireworks o bisan unsa nga matang sa pabuto subay sa pagsunod ubos sa lagda sa Philippine National Standard Specifications.

Gidid-an usab ang mga bata sa pagbaligya, pag-apod ug paggamit sa tanang matang sa pabuto.  Si Garcia nagkanayon nga kadtong mga barangay nga walay igong lugar sa kapahigayonan og fireworks display mamahimo nga makig-alayon sa silingang barangay aron nga masiguro nga luwas ang pagsaulog sa pasko ug bag-ong tuig.

Alang kang Garcia ang pagluwat sa EO nagpasabot kini nga dili magsaya-saya ug magmabinantayon kanunay sa seguridad ang mga lumulupyo sa siyudad niining panahon sa pasko. (BANAT NEWS)