Blocktimer na-entrap

CEBU, Philippines — Usa ka radio blocktimer ug kauban niini ang gidakop sa entrapment operation sa mga sakop sa Criminal Investigation and Detection Group(CIDG) Cebu City Field Unit ug Talisay City Police Station sulod sa usa ka mall sa Barangay Lawaan 2, Dakbayan sa Talisay kagahapon sa hapon, Huwebes, Nobiyembre 28, 2024.

Gidakop sa kapulisan si Roger Cimafranca, 44, taga Sitio Orchids, Barangay Biasong, Talisay tungod sa matud pa reklamo ni Talisay City Mayor Gerald Anthony "Samsam" Gullas kay gikilkilan siya niini og P4 milyones.

Apil sab sa nadakpan si Joselito Dullano, 37, taga V. Rama Quijano Compound, Barangay Calamba, Cebu City.

Nidangop si Gullas sa CIDG-7 kay giingong gipugos siya ni Cimafranca pagbayad og P4 million bugti sa pag-withdraw ni Cimafranca sa iyahang pagdagan isip mayor sa Talisay City.

Base sa affidavit ni Gullas, giingong gihulga ug gi-blackmail siya niini nga kun dili mohatag sa kwarta duna kini pabuthon nga mga isyu batok niya.

Nahitabo ang operasyon diha sa usa ka coffee shop sulod sa usa ka mall sa Barangay Lawaan 2, Talisay City nagkasabot ang mga suspetsado ug ang mga tawo nga maoy mohatag sa kwarta nga gipangayo sa duha.

Matud pa nigamit og P10,000 genuine money ug P199,000 budol money nga gisulod og green envelope ang gitunol ngadto kang Cimafranca, human niya kini dawata, gihamagan kini dayon sa mga operatiba ug giposasan ug gidala sa opisina sa CIDG-7.

Apan si Cimafranca sa pagatubang sa mga sakop sa media hugot nga mihimakak nga siya nangikil sa mayor. Matud pa niya wala siya wala siya'y rekord sukad-sukad nga siya nangwarta.

Gitug-an niya nga sa wala pa ang Nobiyembre  15, 2024 giingong dunay mga tawo nga kaalyado matud pa sa mayor nga nihangyo niya nga mo-withdraw sa iyahang kandidatura bugti sa kwarta nga ihatag nila ngadto niya.

"Dili kana tinuod, wala gyud koy gipangayo, sa tinuod lang wala koy gipangayo nga amount, sila maoy ni-offer," ni Cimafranca pa.

Kasong robbery extortion ang kasong ipasaka batok sa mga suspetsado. (BANAT NEWS)