“Hitman” ni barok napatay

CEBU, Philippines - Napatay sa kapolisan ang giingong sinaligan ug hitman sa suspetsadong drug lord nga si Alvaro ‘Barok’ Alvaro human kini misukol ug nakigpinusilay sa mga polis atol sa gipahigayong buy-bust operations didto sa Barangay Looc, Dakbayan sa Danao kagahapon sa buntag.

Ang report nga miabot sa Cebu Provincial Police Office (CPPO) miila sa napatay’ng suspetsadong pusher nga mao si Antonio Lopez Jr. alyas Tunro. Matud pa nga si Lopez nasakmitan og usa ka kalibre .38 nga revolver, 11 ka pakete nga may sulod nga gituohang shabu, ug P1,100 nga gituohang halin ni Lopez sa pagpamaligya og shabu.

Gibana-bana nga ang shabu nga nasakmit gikan sa suspek mokantidad og P297 mil.

Si Chief Inspector Gerard Ace Pelare, hepe sa kapolisan sa dakbayan sa Danao, miingon nga sukad nga mitahan sa kapolisan si Barok niadtong Hunyo sa miaging tuig, wala na masigpati si Lopez sa maong siyudad.

Apan nasayran sa kapolisan nga mibalik si Lopez sa Danao mga duha na ka semana ang milabay ug maoy hinungdan nga gi-monitor dayon sa mga sakop sa intelligence unit ang iyang kalihukan.

Matud ni Pelare nga nag-estambay ra si Lopez sa gawas sa ilang panimalay samtang naglingkod sa iyang motor diha nga nagpahigayon ang kapolisan og buy-bust operation, apan nakamatikod kini nga mga polis ang anaa sa iyang palibot mao nga misuway kini og dagan apan nakigpinusilay sa kapolisan.

Nakaangkon si Lopez og tulo ka samad agi sa pinusilan sa lainlaing parte sa iyang lawas ug maoy hinungdan sa diha-diha niyang kamatayon.

Si Pelare miingon nga wala na masayri sa kapolisan kon diin, ug kon kinsa ang supplier sa shabu ni Lopez tungod sa iyang kamatayon.

Matud sa kapolisan nga bisan og si Lopez maoy sinaligan ni Barok sa iyang negosyo sa ilegal nga drugas kaniadto, apan wala kini bisan usa nga criminal record sa  dakbayan sa Danao. (BANAT NEWS)