Langyaw gikuota’g cellphone

CEBU, Philippines - Usa  ka  langyaw  kauban  sa lain pang  unom  ka  tawo  ang  nabiktima  sa panguot samtang misaksi  sa Grand  Parade  sa Sinulog 2014 kagahapon sa  alas 10:50  sa  buntag.

Ang  maong  langyaw giila  sa kapolisan  nga  si Hubert Johan Jacob Janssen, 55, usa ka  taga Netherland  ug  kasamtangang  nagpuyo  didto  sa barangay  Guinakot, dakbayan  sa Danao.

Ang  biktima  gikuotan og  cellphone atol sa pagduot-duot sa  mga  nanan-aw sa  Grand Parade   didto  sa  Osmeña Boulevard, Barangay  Sta. Cruz.

Base sa imbestigasyon sa Fuente Police Station   naglakaw  ang  biktima  uban sa iyang uyab,   ug  mga  paryenti niini.

Taliwa  sa kahuot  sa mga tawo,  nangarisgar  ang  langyaw  ug  ang  iyang  uyab  ug uban  pang  kaubanan  sa  paglighot  aron makakita sa Grand Parade sa Sinulog.

Apan  wala  siya’y  kalibotan     nga  gikaw-itan  na  sa  mangunguot  nga  pilit  og  kamot ang  iyang  cell  phone.

Paghiling niya  sa  iyang  bulsa,  nasinaw  na ug nawagtang  na ang  iyang  mahalong  Sonim cell phone.

Matud  pa  sa biktima  nga  bag-o  pa niyang  napalit  didto  sa Netherlands  ang  maong  cellphone sa kantidad  nga  P20 mil.

Gitambagan  siya  sa kapolisan  nga  dili  angay  mokompiyansa  dinhi sa Sugbo  tungod  sa kadaghang mangunguot    nga  dili  usahay  mabantayan  sa mga  otoridad.

Giawhag  usab  sa kapolisan ang  tanan  nga  dili  angay  magdala  og  mahalong  mga  alahas  ug kuwarta  aron  nga  dili  madisgrasya  sa  mga  kamot  sa mga  kiriwan.

Sa pagkakaron,  padayon pa   nga gipangita sa kapolisan ang mangunguot nga mibiktima sa maong langyaw. (BANAT NEWS)