Bag-ong hepe sa NBI taga Bohol

CEBU, Philippines - Usa  ka Bol-anon nga beteranong field investigator ug abogado ang natudlong bag-ong hepe sa National Bureau of Investigation (NBI).

Sumala pa ni Elvira Bongosa sa Philippine Information Agency 7 (PIA-7) nga si Deputy Director for Regional Services Virgilio Mendez na karon ang direktor sa NBI.

Si Mendez naggikan sa  Bayongan, lungsod sa San Miguel, Bohol.

Dugang pa ni Bongosa nga si Mendez nanumpa sa katungdanan atubangan ni Justice Secretary Leila de Lima sa miaging  adlaw, susamang petsa niadtong 1978 diin nisulod siya sa maong buhatan isip NBI Agent I. Gipadayag ni Bongosa nga sa ika-36 ka tuig nga pag-alagad sa maong buhatan, si Mendez nakasikop og mga kriminal  nga maisip  nga high-profile .

Dugang pa ni Bongosa nga lakip sa mga malampusong pagpanakop nga naghatag ni Mendez og pasidungog mao ang  pagdakop  niya kang Guialaludin 'Boy Muslim' Otto, usa  ka wanted sa  duha ka  kuwentada  nga  kasong   murder.  Nadakpan  usab  niya  si Abdulgani "Abdul Malang" Abas kansang pagkasikop maoy hinungdan  nga  nadakpan  usab ang  mga  improvised explosive device, ug ang mga suspetsado sa brutal nga pagpatay ni Kristelle “Kae” Devantes.

 Niadtong 2011, natudlo siya sa kanhi posisyon isip deputy director for regional operations services.

Unya natudlo  usab siya isip NBI Regional Director sa Rehiyon 10 niadtong 2004.

Si Mendez usab ang responsabli sa pagkasikop sa mga suspetsado sa pagkamatay ni Lingayen Vice Mayor Ramon Arcinue ug sa iyang asawa.   

 Siya usab ang lead investigator sa Atimonan shootout ug personal nga  nitutok sa imbestigasyon sa Cagayan de Oro bombing.

Siya usab ang nangulo sa imbestigasyon sa gituhuang rice smuggler nga si David Tan.

Natapos ni Mendez ang pagtungha sa sekondarya sa Immaculate Heart of Mary Seminary sa syudad sa Tagbilaran ug nilampos usab siya sa iyang pagtuon sa abogasiya sa Divine Word College sa maong syudad.

Gihulipan ni Mendez si Atty. Medardo de Lemos nga nitindog isip OIC sa buhatan human niluwat sa katungdanan si NBI Chief Nonnatus Rojas niadtong Septiyembre. Tungod niini, ang Provincial Peace and Order Council atol sa tigom dili pa  dugay mipasar og usa  ka resolusyon nga nagdayeg sa nakab-ot ni Mendez sa natad sa panerbisyo sa katawhan.

Ang maong PPOC meeting gipangunahan ni Gob. Edgar Chatto nga mao usab ang nag-abogar sa maong resolusyon alang kang Mendez, kinsa usa sa mga “Outstanding Boholano” nga gipasidunggan atol sa Bohol Day niadtong tuig 2012. (BANAT NEWS)