Boy best friend

Dear Tito Miguel,

Ako diay si Joshua Philip. Naa koy problema bahin sa akong uyab nga si Shania. Adunay siya’y boy best friend ug dugay na gyud ang ilang panaghigalaay , ug suod na sila daan bisan wala pa ko niabot sa iyang kinabuhi.

Sa tinuod lang, wala man koy problema sa ilang friendship nisalig rako ni Shania. Nasabtan pud nako nga dili nako angay pugngan ang ilang panaghigalaay . Pero usahay, dili gyud nako malikayan nga magselos tungod sa ilang pagkasuod. Kung makita nako sila nga komportable kaayo sa usa'g usa, makahunahuna ko og daghang butang. Bisan pa og wala koy klarong rason nga magduda kang Shania, lisod gihapon nako kontrolon akong gibati. Usahay, maapektuhan na gani akong hunahuna .

Dili ko gusto nga tungod sa akong selos , mahimong kontrolado nako si Shania o mapugos siya sa pagpili tali nako ug sa iyang best friend. Gusto lang nako nga makat-on ko unsaon pagdumala sa akong pagbati ug pagsalig kaniya. Unsaon nako pag-deal akong selos nga dili nako madaot ang among relasyon? Kinahanglan ba nako nga istoryahan si Shania bahin sa akong gibati, ug unsaon nako paghatag kaniya og pagsalig bisan naa siya'y boy best friend? — Joshua Philip

* * *

Joshua Philip,

Masabtan nga magselos o magduda ka sa kasuod nila duha. Istoryaha imong uyab sa imong gibati. Apan sa lahi nga pamaagi. Pangutan-a kun duna ba’y uyab iyang boy best friend. Ka’y kun duna, tambagi siya nga mo-distansiya. Kay ngil-ad tan-awon nga mora sila’g uyab pero duna sila’y tagsa-tagsa ka mga uyab. Maski na ibutang ta nga wala gyu'y malisya ilang panaghigala, dili gihapon malikayan nga ang uyab sa iyang boy best friend magduda.

Busa kinahanglan menos-menosan nila ilang kasuod. Gani, mas maayo unta magkita sila kuyog sa grupo o barkada lang ini’g tapok. Posible moingon wala siya’y pakialam sa isulti sa mga tawo, ka’y limpyo iyang konsensiya. Ingna nga dili ra na tungod sa ubang tawo kun dili sa ilang mga uyab mismo. Sigurado moingon na nga maski diay ikaw nagduda. Diha na ka mobolada sa imong tinuod nga gibati. Angkona nga nagduda ug nagselos ka, apan imong gipugngan kay nisalig ka kaniya. Kun moingon naa ra man diay na, buot pasabot wala siya maghunahuna sa imong gibati. Kay kun husto pa siya, siya mismo modistansiya sa iyang boy best friend isip respeto kanimo.

Busa ingna, kun duna sab ka’y suod nga girl best friend, okay ra ba niya? Ka’y kun ok ra niya, ingna puwede sab nimo sundogon ilang panaghigala sa laing babaye. Posible moingon ikaw ang bahala, pero sa tinuod dili na siya mahimutang. Diha siya makaamgo nga nilapas na siya’g nisimang isip uyab nimo. —Tito Miguel

Magpatambag ka? Ipada kang Tito Miguel: 0991-318-9366