Shinjuku Givers sa Japan kampiyon sa Cebu Hustle 3x3

CEBU, Philippines — Ang Shinjuku Givers sa Japan midominar sa undermanned nga Uratex Dream, 21-8, aron langkaton ang korona sa labing unang Cebu Hustle 3x3 niadtong weekend sa Mountain Wing sa SM Seaside City.

Sila si Esther Ibeh ug Yumi Takakuwa nagtambayayong paglusad sa nagkayong 9-0 nga sinugdanan sa Shinjuku. Wala na sila molingo pa sukad niadto.

Si Takakuwa, nga kanhi import sa Uratex Dream, mitagak og sayes puntos samtang si Ibeh mitali og siyete puntos ug lima ka rebounds aron sakmiton ang MVP award.

Ang ubang miyembro sa Shinjuku nga nakadawat og $3,000 nga premyo mao sila si Mizuno Naho ug Milai Mori.

"We fought from the beginning until the end and I'm very happy that we got the win and I got to show my skill," matud pa ni ni Ibeh, nga miduwa og 3x3 basketball sa unang higayon.

Ang Nigerian nga sentro giduyogan sa Mythical Three nilang Renzhu Li sa Uratex Dream ug Kiri Endo sa CT Tigers sa Thailand.

Ang Uratex miduwa nga kuwang og tawo sa kampiyonato gumikan kay si Angel Surada na-injured atol sa 13-12 nilang kadaogan batok sa Pilipinas Aguilas sa semifinal.

Bisan pa man niini, ang Uratex Dream mapasigarbuhon nga mitapos isip runner-up nga naghatud kanila og $2,000 nga ganti.