Wildcats mipakurat sa Webmasters

CEBU, Philippines — Angh Cebu Institute of Technology-University (CIT-U) Wildcats mipakugang sa University of Cebu (UC) Webmasters, 59-53, sa Cebu Schools Athletic Foundation, Inc. (CESAFI) Season 26 basketball tournament niadtong Huybes sa gabii, Oktubre 1, sa Cebu Coliseum.

Nabiyaan ang Wildcats og siyete puntos sa saying bahin apan sila na maoy nagkontrola sa suwa sukad nailog nila ang labaw, 29-27, sa halftime. Miabante sila og nuybe puntos sa wala pa milakaw uban ang sayes puntos nga kadaogan.

Si Braebon Ali Thompson mihipos og 13 puntos, siyam ka rebounds, duha ka assists ug usa ka steal alang sa Wildcats, nga miinat sa ilang rekord ngadto sa 4-3 tabla sa Webmasters.

Si Luther Leonard miposte og double-double nga 19 puntos ug 10 ka rebounds, samtang si Maverick Eligoyo midugang og 12 puntos ug walo ka rebounds sa nahagba nga UC.

Sa juniors division, si Jake David Guanco mipupo og 17 puntos, upat ka rebounds ug tulo ka assists aron ibandera ang Benedicto College (BC) Baby Cheetahs ngadto sa 61-56 nga pagpakaging sa San Carlos School of Cebu (SCSC) Baby Warriors.

Si Rajnish Butaslac miamot og 11 puntos, upat ka rebounds ug duha ka steals alang sa Baby Cheetahs, nga nagkupot na og 2-3 nga baraha.

Si Lance Luther Aballe mipabuto og 25 puntos uban ang unom ka rebounds, tulo ka assists ug tulo ka steals, samtang si Ahron Andrei Casul mitali og 15 puntos, unom ka rebounds, upat ka steals ug usa ka assist apan nakawang ang maanindot nilang salida kay ang Baby Warriors nakatilaw sa ikatulo nilang pildi sa lima ka duwa.