Webmasters mikastigo sa Warriors, 2-0 na

CEBU, Philippines — Ang University of Cebu (UC) Webmasters  mibugha sa vi University of San Carlos (USC) Warriors, 81-63, alang sa ikaduha nilang sagunson nga daog sa Cebu Schools Athletic Foundation, Inc. (CESAFI) Season 26 basketball tournament niadtong Huybes sa gabii, Septiyembre  10, sa Cebu Coliseum.

Si Ricofer Sordilla mipabuto og 23 puntos uban ang tulo ka rebounds, usa ka assist ug duha ka steals samtang si Luther Leonard miposte og double-double nga 17 puntos ug 10 ka rebounds uban ang upat ka assists ug usa ka block alang sa Webmasters.

Sikit ang duwa sa unang kuwarter lamang gumikan kay ang Webmasters misirit ngadto sa 40-31 nga labaw sa halftime ug wala na molingi pa.

Ang mga batos ni coach Kernn Sesante misirado sa ikatulong kuwarter uban ang 56-46 nga bentaha ug padayon silang nanginit sa nahibiling bahin sa duwa aron pagkab-ot og 18 puntos nga demolisyon.

Si Maverick Eligoyo mihimo sab og kasikas bitbit ang 16 puntos, lima ka rebounds, duha ka assists ug usa ka steal alang sa Webmasters, nga mosuway pag-inat sa sagunson nilang daog ngadto sa tulo ka duwa sa dihang sangkaon nila ang University of San Jose-Recoletoes (USJ-R) Jaguars sa alas-5 sa hapon karong adlawa (Sabado, Septiembre 12).

Si James Paolo Gica maoy nangu sa  Warriors bitbit ang 18 puntos, lima ka rebounds ug usa ka assist.

Si Jhoernel Tangkay mihipos og 15 puntos, pito ka rebounds ug upat ka assists

samtang si Rey James Enriquez mitali og 10 puntos, tulo ka rebounds ug tulo ka assists alang sa Warriors, nga wala makapadayon sa makapakurat nilang sinugdanan diin ilang gitumba ang four-peat champions University of the Visayas (UV) Green Lancers, 81-68.

Sa juniors division, ang San Carlos School of Cebu (SCSC) Baby Warriors mikulit sa una nilang daog human sila nakaipsot sa Don Bosco Technical College (DBTC) Greywolves, 65-64.

Si Heath Lauren Macapil ang bida sa Baby Warriors uban ang 13 puntos, 10 ka rebounds, tulo ka assists ug duha ka steals.      

Si Lance Luther Aballe mitampo og 13 puntos ug pito ka re ounds samtang si Ahron Andrei Casul midugang og 10 puntos, duha ka rebounds ug duha ka steals alang sa Carolinians.

Si Zane Oddyssie Ondoy mikolekta og 14 puntos ug walo ka rebounds.

Si Antonio Joseph Issifu mitimbre og 13 puntos, siyam ka rebounds, duha ka assists ug tulo ka  steals samtang si Christian Tabio Lambayan adunay 11 puntos, upat ka rebounds ug unom ka steals apan nakawang ang ilang paningkamot kay mga Bosconians nahagba na sab.