Uyab nga demanding

Dear Tito Miguel,

Ako diay si Rejoice, 24, anyos, taga Barangay Hipodromo, Cebu City.

Naa ko’y uyab nga ginganlan og Dominic, 21 anyos nga taga Barangay Calamba, Cebu City , walo na ka buwan ang among relasyon.

Gihigugma nako si Dominic ug naningkamot gyud ko nga mahimong maayong uyab niya. Pero usahay, kapoyon ko kay sobra siya ka-demanding. Dili lang sa oras ug atensyon, apil na gyud ang pagkaon ug uban pang personal niyang panginahanglan.

Kung unsa iyang gusto nga pagkaon, kinahanglan akong pangitaon o maandam. Kung adunay siya’y mga personal nga kinahanglan, ako dayon iyang duolon ug kasagaran mag-expect siya nga ako ang moatiman. Kung dili nako matuman iyang gusto, usahay masuko siya ug nabalaka ko nga basin mag-away na pud mi

Naka-feel ko nga murag ako na lang pirmi ang nag-adjust ug nag-atiman, samtang gamay ra kaayo iyang pagsabot kung kapoy na ko o naa pud koy kaugalingong mga kinahanglanon.

Nakasulay na ko og sulti niya nga dili tanan niyang gusto mahimo nako dayon, pero iyang tubag kay kung gihigugma daw nako siya, dili unta ko maglisod sa paghatag sa iyang mga panginahanglan.

Sakto ba nga akong pasagdan ang iyang pagka-demanding tungod kay gihigugma nako siya? O kinahanglan ba nako siyang tudloan nga ang relasyon dili lang kay usa ang sige og hatag ug usa ang sige og pangayo? O uto-uto lang gyud ko nga pagkatawo? — Rejoice

* * *

Rejoice,

Kun dili kaya sa imong oras, o maglisod na ka’g apas, balibari. Dili man kaha siya baldado, kaya niya buhaton ang iyang gisugo nimo. Pero ka’y uyab mo, tingali sa primero ganahan ka’g gikilig moserbisyo ka’y lagi namarayeg.

Pero kun moabot na sa punto nga kapoy na, ayaw pugsa imong kaugalingon. Ingna dili nimo kaya, kun mamugos siya o mangluod o masuko, buot pasabot kaugalingon ra niya iyang gihunahuna. Syaro’g wa gyud siya kakita nga naglisod na ka?

Kani ang buhata, kun unsa iyang isugo nimo karon, buhata kun kaya. Apan sunod adlaw mao na sab imong isugo niya. Kun mosugot, maayo. Kun mosugot apan magbagulbol, tabla ra nga nibalibad siya. Nagbaga nga red flag. Ngano dili man siya puede mobawos hatag sa pabor nimo? Kun bug-at para niya ang moserbisyo kanimo, basin dili pa ka niya hingpit nga gihigugma. Kun sa ginagmay nga butang dili niya buhaton para nimo, unsa na lang kaha sa dinagko, sama pananglit kun masakit ka. Di kaha pasagdan ra ka o biyaan pa ka’y wala na ka’y silbi niya?

Gani, dunay mga tawo nga tapolan sa balay, dili masugo sa ginikanan, apan sa uyab paspas pa sa kilat. Tungod kay nahigugma sila, hadlok ug nirespeto pa. Kun ikaw sayon sayonon ra niya’g sugo, apan ikaw dili kaniya makapamalihug, angay na ka magduha duha. Dili siya kapikas, kay ang inyong relasyon dili patas. Ang uyab katimbang, dili katabang. — Tito Miguel

Magpatambag ka? Ipada kang Tito Miguel: 0991-318-9366