VP Sara nalutsa’g warrant

CEBU, Philippines — Nag-atubang karon og posibilidad nga dakpon si Vice President Sara Duterte human nga nipagawas na og arrest warrant ang Quezon City Regional Trial Court Branch 98  kagahapon, adlaw nga Biyernes, September 4,  para sa three counts nga kasong grave threats.

Kaning mga hulga mahitungod na sa giingong livestreaming ni VP Duterte sa social media diin iyang giingon nga naa na siyay tawong nakaestorya para patyon silang Presidente Ferdinand Marcos Jr, First Lady Liza Araneta Marcos  ug kanhi speaker Martin Romualdez kung dunay dautang mahitabo sa iya.

Ang korte miingon nga mahimong makapiyansa og P120,000 kada count sa kaso ang bise presidente alang sa temporaryo niyang kagawasan.

Gibutyag sab sa Department of Justice nga gi-deny sa korte ang giduso nga "Motion to Defer the Issuance of or Recall Arrest Warrant and Quash the Information" sa kampo sa bise presidente.

Sa samang resolusyon,  gitug-an sa korte nga nakakita kini og probable cause para ipaubos sa husay sa korte ang tulo ka mga pagpanghulga ug gimando ang pagpagawas og arrest warrant,  sumala pa sa DOJ. "The Department respects the Court's ruling and reaffirms its commitment to the rule of law," dugang pa sa DOJ.

Si VP Duterte nipagawas sab og pamahayag nga nadawat na sa iyang buhatan ang warrant kagahapon. "I confirm that I was given notice of a warrant of arrest dated September 4, 2026 issued by Judge Maria Angelica De Ramos of Branch 98, Quezon City and served by PNP Col Christine Tabdi in the Office of the Vice President. My lawyers Attys Paul Lim and Clifford Chua will attend to this matter immediately," matud pa niini.

Ang abogado ni Duterte nga si Lim,  niingon nga ilahang gamiton ang tanang legal nga pamaagi bahin sa kaso.  Atol sa maong gikwestyon nga video conference niingon nga naa na siyay tawong nakaestorya nga iyang gimandoan nga patyon ang tulo kung dunay dautang mahitabo kaniya.

Apan human nitumaw ang imbestigasyon sa NBI bahin sa hulga, gihimakak sa bise presidente nga nilitok siya og pulong nga “hitman” sa maong video conference ug sayop daw pagsabot ang iyang gipamulong.

"Regardless of the question on jurisdiction, she has no intention of evading the law and will continue to exercise all her legal remedies," matud pa sa pamahayag ni Lim. Wala sab hinuon maklaro kung motahan ba sa iyang kaugalingon si Duterte agi og respeto sa warrant.

Kahinumdoman nga adtong Agosto 11, gipasaka sa piskalya ang kaso batok kang Duterte samtang nagpadayon ang Senate impeachment trial batok sa bise.

Ang kaso gipasaka basi sa findings sa National Bureau of Investigation nga ilang gipasa sa DOJ ato pang Pebrero 2025.

Ang maong hulga gihimo ni Duterte atol sa online press conferences atong Oktobre ug Disyembre 2024, usa sab kini sa mga kaso nga giapil sa Article IV of the articles of impeachment batok sa iyaha.—Gikan sa Philstar.com/IBM BANAT NEWS