SugBohol Sisterhood Agreement pirmahan karong Hulyo 31

CEBU, Philippines — Gihatagan og awtoridad sa Sangguniang Panlalawigan sa Sugbo si Gobernador Pamela S. Baricuatro sa pagpirma sa SugBohol Sisterhood Agreement uban sa Lalawigan sa Bohol aron opisyal nga mapalig-on ang pagtinabangay sa duha ka probinsiya.

Giaprobahan ang maong resolusyon atol sa regular nga sesyon sa Provincial Board niadtong Lunes, Hulyo 20.

Pinaagi sa resolusyon, gitugotan si Baricuatro nga mopirma sa Memorandum of Agreement (MOA) uban kang Bohol Gov. Erico Aristotle C. Aumentado isip representante sa Lalawigan sa Sugbo.

Gikatakdang pirmahan ang maong kasabutan sa Hulyo 31 didto sa Lalawigan sa Bohol.

Ang resolusyon gisang-at ni Provincial Board Member Malcolm Sanchez, nga nag-ingon nga ang kasabutan nagtumong sa pagpalig-on sa kooperasyon tali sa Cebu ug Bohol sa nagkadaiyang sektor.

Lakip sa gitutokan sa SugBohol Sisterhood Agreement ang turismo, pamatigayon, negosyo, pamuhunan, imprastraktura, agrikultura, pangisda, edukasyon, panglawas, kultura, pagpanalipod sa kinaiyahan, disaster resilience, digital governance ug uban pa nga adunay susamang interes ang duha ka probinsiya.

Gihisgotan usab sa resolusyon nga ang Provincial Government of Bohol maoy naghimo sa draft sa SugBohol Sisterhood Agreement ug opisyal kining gipadala sa Provincial Government of Cebu alang sa pagrepaso ug pinal nga pagpirma.

Aron masiguro ang hapsay nga pagpatuman sa kasabutan, magtukod usab ang Sugbo og Provincial Technical Working Group (TWG).

Ang TWG pagasakupan nila PB Members Stanley Caminero, Lakambini Reluya, Malcolm Sanchez, Nelson Mondigo ug Raymond Calderon, kauban si Sangguniang Panlalawigan Secretary Atty. Pulchra Marie Acevedo.

Sila ang mangulo sa koordinasyon, pagmonitor ug pagtimbang-timbang sa mga programa ug kalihokan nga ipatuman ubos sa SugBohol Sisterhood Agreement.

Gitugotan usab sa resolusyon ang gobernador sa paghimo og mga rebisyon o kausaban sa draft agreement kon kini uyon sa tumong sa Joint Resolution No. 01-2024 ug wala mosupak sa kasamtangang mga balaod.  MEL  BANAT NEWS