Wa makasulbad

Way kulba nga maputlan sa kuryente kadtong mga residential houses nga gagmay ra og konsumo sa usa ka buwan kay gimandoan sa Energy Regulatory Commission (ERC) ang mga power distribution company nga dili nila putlan og kuryente ang ilang konsumedor kon di makabayad.

Gitataw sa ERC nga hangtud lang kini sa Oktubre, unya ang makapahimulos niining maong kamandoan sa ERC mao kadtong mga konsumedor nga ang konsumo sa kuryente wa molapas sa 200 kilowatt-hour ang usa ka buwan.

Apan aron dili sab modako ang bayranan, giawhag sa ERC ang mga distribution company nga mogama sila og installment plan nga dili kaayo bug-at ang bayranan sa mga kunsomedor.

Pero tambag nako sa mga konsumedor nga kon madala pa sa pagbayad, bayari gyud aron dili magdako ang inyong obligasyon kon molapas na sa Oktubre.

* * *

Kada uwan, bisan dili kaayo kusog basta molungtad og usa ka oras, maglunop dayon ang mga karsada sa downtown area sa Cebu City, sama sa Manalili ug D. Jakosalem Streets.

Kaniadto daghan ang nahinangop nga si Mayor Nestor Archival ang nakadaog kay usa kuno ka engineer, ug dunay ideya unsaon pagsulbad ang dugay na kaayong problema sa lunop ug baha sa downtown area.

Apan nasayop sila, kay way nahimo si Archival pagsulbad sa problema sa paglunop ug pagbaha. Gitan-aw nako ang sapa likud sa 138 Mall (kanhi Fairmart), aw lawom na tuod ug wa na kadtong mga nagliundok nga bas.

Unsaon pagsulbad sa lunop ug baha sa Estero de Parian, kanang sapa nga anaa moagi ilawom sa building sa Gaisano Main, nga wa man kabkabi sa ba’as ang maong bahin sa sapa?

Gani, pagsusi nako niadtong Lunes, ang tubig dili hapit makaagi sa taytayan sa D. Jakosalem tungod kay napuno sa mga basura, gabok nga sin, ug duna pay duha ka puthaw nga hagdan para sa backhoe nga wa kuhaa nga nakatampo sa pag-ali sa tubig.

Gusto gyud unta nako nga pakighinabian si Archival kabahin sa mga isyu nga naglambigit ang siyudad atol sa akong programa sa radyo, apan lisud kaayo ang pagkontak sa mayor.

Duna man tuod ko’y direct contact kang Archival apan ang problema kay dili motubag.

Kon adtoon nimo sa iyang opisina sa City Hall lisud ka makasu’d kay babagan ka sa mga guwardiya.

Mao na’y pagaingnon nga wa pa gani mahuman ang usa ka termino, nausab na. Atol sa termino sa mga nangaging mayor, nilang Tommy Osmeña, makasulod ra man ka sa opisina sa mayor nga giukopahan sa iyang staff. Apan karon, lisud na.