Asa ang kaangayan

Perting yawyaw sa manindahay daplin sa dalan human gisakmit sa mga sakop sa Probe team ang iyang mga baligya.

Ang dalan dili puwede nga tindahan kay kini agianan sa mga tawo ug sakyanan. Mao ni ang rason nganong gisakmit ang paninda kay magsige lang pod balik-balik paninda sa dapit gidili ang mga manindahay. Pero kun ang dalan dili patindahan kay kini agianan sa mga tawo ug sakyanan, nganong gihimo man kining parkinganan?

Adunay mga dalan nga wala na paagii og sakyanan ug gihimo nalang kini nga parkinganan sama ning dalan luyo sa Bangko Sentral nang Pilipinas ug Cebu Normal University. Ang kilid sa dalang Borromeo gihimo usab nga parkinganan.

Kining patakaran sa gobiyerno sa dakbayan sa Sugbo pabor gyod kanunay mga datu ug adunahan.

Luoy kaayo ang manindahay nga gisakmitan sa iyang paninda maong nakasabot ra ko niya nga nagyawyaw.

Nanginabuhi siya og tinarong pero gidakop. Wala siya nangawat, wala siya manolis, wala siya namaligya og gidili nga drugas. Nanginabuhi siya og ginagmay aron mabuhi pero gikonpiskar ang iyang panginabuhian.

Akong sugyot sa mga opisyal sa kagamhanan sa dakbayan sa Sugbo, ayaw ninyo sakmita ang baligya sa mga ambulant vendor kay luoy pod sila. Wala seguro mo masayod nga ang ilang gipuhonan sa ilang paninda inutang.

Tabangi ninyo ang mga ambulant vendor kay basin sa inyong tabang makapatukod sila og dako na nga tindahan. Kun gihimo ninyong parkinganan ang dalan, walay rason nga dili pod ninyo tugotan nga makapaninda sa dalan ang mga ambulant vendors, kay kun dili, dili mo patas.

Kontra pobre kamo ug pabor sa dato. Gitagaan ninyo og pabor ang mga may sakyanan pero inyong gipiit ang mga nanginabuhi.