Archival nimando sa kapolisan nga dakpon ang nanglugos sa kahera

CEBU, Philippines — Ipadakop ni Cebu City Mayor Nestor Archival, Sr. ang usa ka ex-convict nga giingong nanglugos sa usa ka 26-anyos nga kahera sa usa ka tindahan og ilimnong makahubog diha sa Barangay San Nicolas niadtong Hulyo 10, 2026 sa kadlawon.

Ang maong insidente nakuhaan og footage sa closed circuit television (CCTV) diin gi-upload diha sa social media apan gipapas kini tungod kay nakita ang dagway sa biktima.

Ang suspetsado giila nga si Clark David Tejido gipasakaan kini og kasong alarm and scandal ug grave threat niadtong Mayo 24, 2026 apan nakapiyansa kini karong buwana.

Apan si Tejido gikatahong nihimo na usab kini og laing krimen.

Base sa CCTV footage nakita nga gibira sa suspetsado ang kamot sa biktima ug gitionan ug kutsilyo aron hadlokon ug gidala ngadto sa ngitngit nga dapit.

Ug tungod sa kahadlok sa biktima nisunod kini sa mga mando sa suspetsado bisan pa nga aduna kini plano nga moikyas.

Sa pamahayag sa biktima ngadto sa kapolisan nangangkon kini nga giamong-amongan siya sa suspetsado.

Dali nga niikyas ang suspetsado human nisinggit ang bana sa biktima tungod kay nakita niini ang hitabo.

Ang biktima dali usab kining nitaho diha sa Mambaling Police Station ug matud niini nakaila siya sa suspetsado tungod kay suki kini sa ilang tindahan apan wala siya magdahom nga aduna kini daotang plano ngadto kaniya.

Matud ni Archival nga kinahanglan nga prisohon pagbalik ang suspetsado aron dili na kini makapamiktima ngadto sa lain.

Nimando si Archival sa kapolisan nga dakpon ang suspetsado tungod kay nakahatag kini og peligro ngadto sa uban.

Niawhag usab ang mayor ngadto sa suspetsado nga motahan kini tungod kay angayan nga tubagon ang iyang nahimo nga kalapasan.

Nanawagan usab ang mayor ngadto sa publiko nga dili magbiay-biay sa nasinati sa biktima apan hatagan kini og pagsabot ug angayan kini nga kaloy-on tungod kay dili lalim ang iyang nasinati nga trauma ubos sa mapahimuslanon nga tawo. (BANAT NEWS)