NLEX coach Jimmy gilihian og impresibong kadaogan

CEBU, Philippines — Si Jimmy Alapag nagmadaogon sa iyang debut isip head coach sa PBA.

Kini human gitimon ni Alapag ang NLEX Road Warriors ngadto sa impresibong 114-75 nga demolisyon sa Macau Giant Pandas pagsugod sa PBA Season 50 Governors’ Cup didto sa Ynares Center-Antipolo niadtong Biyernes, Hulyo 10.

“I’m really happy with the group, with their competitive spirit and unselfishness,” matud pa ni Alapag, nga mipaduwa sa tanan niyang 16 ka players.

“We had 30 assists. That says a lot. It’s a good foundation we can build on,” dugang pa sa kanhi bitoon sa TNT ug Gilas legend.

Si DeQuan Jones mipupo og 23 puntos ug 11 ka rebounds, samtang si Kevin Alas midugang og 19 puntos, tulo ka rebounds, duha ka assists ug duha ka steals.

“It’s nice we got coach Jimmy his first official PBA win,” dason pa ni Alas .

Si LJ Gonzales mi-iskor og 13, sila si JB Bahio ug Schonny Winston nagkumboya'g 21 puntos, samtang si Robert Bolick miamot og nuybe puntos, walo ka  assists ug unom ka rebounds sa dominante kaayong NLEX nga sa usa ka higayon milabaw og 43 puntos.         

Si Damien Chongqui maoy nangu sa Macau uban ang 35 puntos samtang ang import nilang si De’Vondre Perry miposte og 26 puntos ug 15 ka rebounds sa pildirong kawsa.

Sa laing resulta, ang import nga si Justin Strings miharos og  25 puntos ug  16 ka rebounds apan ang rookie nga si  Geo Chiu mikuha og atensiyon uban ang 19 puntos ug  23 ka rebounds sa dihang giligsan sa Terrafirma Dyip ang all-Pinoy nga Titan Ultra, 113-100.

Sila si JM Bravo, Didat Hanapi,  Juami Tiongson ug Maverick Ahanmisi mitali og dili mominus 11 puntos matag usa alang sa Terrafirma.

Ang Titan Ultra miduwa hinoon nga wala ang import nilang si James Milton kay nagpaabot pa kini sa iyang i FIBA Letter of Clearance aron siya makaduwa sa PBA.

Si Aris Dionisio mibubo sa tanan niyang 21 puntos sa second half uban ang siyam ka rebounds alang sa Titan Ulta.         

Si Joshua Munzon mihipos og 15 puntos samtang si Paolo Javillonar adunay 11 puntos apan sa way kapuslanan alang sa  Giant Risers.