Dugang JO aprub

CEBU, Philippines — Giaprobahan na sa konseho sa Dakbayan sa Sugbo atol sa ilang special session niadtong Huwebes ang pagdugang og mga job order personnel alang sa nagkadaiyang departamento sa siyudad.

Ang pagdugang og mga JO subay kini sa manpower requests ni Mayor Nestor Archival niadtong Hulyo 2, 2026 nga magbutang og JO sa matag departamento aron nga mapadayon ang paghatag og batakang serbisyo ilabi na ang mga programa ug mga barangay operations.

Ang mga JO magsugod karong buwana hangtud sa Disyembre 2026.

Gipasabot ni Konsehal David “Dave” Tumulak, tsirman sa Committee on Budget and Finance nga duha ka agenda items ang wala na ilakip sa deliberasyon tungod kay naaprobahan na kini sa niaging session sa konseho niadtong niaging buwan.

Kini mao ang manpower requests alang sa Cebu City Wildlife Conservation and Protection Center ug sa Child Welfare Center sa Department of Social Welfare Services (DSWS).

Ang nahibiling manpower requests nga giaprobahan sa konseho naglangkob sa 14 ka JO personnel alang sa Cebu City Bantay Dagat Commission nga gigahinan og budget nga ?1.58 milyon; lima ka personnel alang sa Cebu City Youth Development Office nga adunay ?435,537.96 nga gahin; 51 ka personnel alang sa South Road Properties Management Office nga adunay ?5.74 milyones nga gahin; ug 68 ka personnel alang sa DSWS Sta. Rita de Cascia Women and Children's Center nga adunay ?5.91 milyones nga gahin.

Naaprobahan usab ang 70 ka JO personnel alang sa DSWS Operation Second Chance nga adunay ?6.78 milyones nga gahi; 80 ka personnel alang sa Persons with Disability Welfare Program nga adunay ?7.86 milyones nga gahin; 66 alang sa DSWS Long Life Program nga adunay ?5.41 milyones ug 10 alang sa Cebu City Women and Family Affairs Commission nga adunay ?1.29 milyon nga gahin.

Niabot ngadto 363 usab ang idugang nga Barangay Affairs Office nga gigahinan og ?25.72 milyones; 29 alang sa Eco-Park Program nga adunay ?3.56 milyones; ug walo alang sa Department of General Services-ERMM nga adunay ?1.46 milyon.

Giklaro ni Tumulak nga adunay legal nga basehan ang pagpahigayon sa special session diin subay kini sa Section 6 sa City Ordinance No. 2795 nga nagtugot sa local chief executive o sa presiding officer sa Sangguniang Panlungsod sa pagdugang sa appropriations gikan sa tigom sulod sa samang expense class apan nagkinahanglan gihapon nga aprobahan sa konseho.

Naglaom ang konseho nga pinaagi sa pag-aproba sa mga manpower requests, malikayan na ang dugang pagkalangan sa pagpagawas sa sweldo sa mga JO human nga adunay gibana-banang 956 ka JO personnel ang wala makadawat sa ilang sweldo sulod sa pipila ka bulan. BDB BANAT NEWS