Ex-GF nga nagsalimoang

Dear Tito Miguel,

Tawga lang ko og Eric, 27 anyos, taga Samboan, Cebu. Aduna koy ex-girlfriend nga ginganlan og Shane. Upat ka buwan nami nga bulag ug wala na ko’y plano nga makigbalik pa kaniya. Ang tinuod nga hinungdan sa among panagbulag mao ang iyang pagka-kontrolado. Gusto niya nga siya pirmi ang masunod sa tanan nakong lihok, bisan sa akong mga higala, trabaho, ug personal nga mga desisyon. Miabot sa punto nga dili nako malipayon sa among relasyon.

Human sa among panagbulag, mura gihapon siya og dili makadawat sa kamatuoran. Sige gihapon siya’g pangita ug paagi aron makig-istorya kanako. Gipasiatab niya pinaagi sa pag-post sa social media nga cheater kuno ko ug mao kunoy hinungdan sa among breakup. Grabe gyud ang iyang pagtumo-tumo.

Gipakaulawan ko niya sa social media. Ang akong sala lang tingali mao ang pagpili nga tapuson ang usa ka relasyon nga dili na maayo para namong duha.

Magpadayon ba ko sa pagpakahilom aron malikayan ang gubot, o kinahanglan na ba nakong depensahan ang akong kaugalingon batok sa mga bakak nga iyang gipakatap? — Eric

* * *

Eric,

Pasagdi, ayaw na’g react maski unsa iya buhaton. Kun modepensa ka sa imong kaugalingon, nakuha niya iyang gusto, ang imong atensyon. Iya na gituyo aron masulod na sad ka sa laang. Busa ayaw na’g tagda, panirado sa tanan buslot nga puede pa siya makalusot ngadto kanimo. I-block na siya sa social media, putla na tanan ninyo nga koneksyon. Maluya ra na kadugayan. Mora ra nimo siya’g gitubila’g full tank kun imong tubagon, samot nga ikaw samokon.

Gi-kontrolar ka samtang kamo, karon nga nakalingkawas na ka ayaw na siya hatagi’g higayon. Gani, ang iyang gibuhat karon usa ka matang sa pagkontrolar kanimo. Pasagdi kun unsa iyang ipatik sa social media. Sa panahon karon, paspas kaayo ma-viral ang mga isyu o iskandalo, apan malimtan lang dayon sunod semana.

Gani, kun mabaniog nga cheater ka, pabor na sa imong mekanismo. Bilib pa nimo imong mga higala. Hinuon, dili ni insakto nga mentalidad ha.

Apan sa iyang gipangbuhat, mao na lang na ang hunahunaa. Sa laktod, igo ra siya nagpatagad. Kun imong patolan, mora ra ka’g nibalik sa sitwasyon nga imong gibiyaan.

Kun pangutan-on ka sa imong mga higala kabahin ninyo duha, ingna lang buwag na mo dugay na. Ayaw na isulti ngano ka’y motaas na sab ang istorya. Kun pangutan-on ka unsa ka tinuod iyang mga pasangil nimo, ingna lang ngadto niya mangutana. Basta para kanimo, tapos na mo. — Tito Miguel

* * *

Magpatambag ka? Ipada kang Tito Miguel: 0991-318-9366