CA: Suspension order sa Ombudsman batok kang Garcia walay bili

CEBU, Philippines — Gideklarar sa Court of Appeals (CA) nga walay bili ang unom ka bulan nga preventive suspension order nga giluwatan sa Office of the Ombudsman batok kang kanhi gobernador Gwendolyn Garcia human kini nga nihukom nga nakahimo og grave abuse of discretion ang anti-graft body sa pagpatuman sa maong suspension atol sa 2025 election period nga walay pagtugot gikan sa Commission on Elections (Comelec). Ubos sa 18 ka pahina sa desisyon nga gipagawas niadtong Mayo 18, 2026, gihatagan og pabor sa fourteenth division sa CA ang petisyon ni Garcia alang sa certiorari ug prohibition ug gibasura ang order nga giluwatan ni Ombudsman Samuel Martires niadtong Abril 23, 2025 sa administrative case OMB-C-A-APR-25-0074 nga adunay titulo nga “Moises Garcia Deiparine v. Gwendolyn F. Garcia.”

Si Associate Justice Marietta Brawner-Cualing maoy nagsulat sa maong desisyon nga gisuportahan ni Associate Justices Gabriel Robeniol ug Maximo De Leon.

Gikwestiyon ni Garcia ang order sa Ombudsman nga nagbutang kaniya ubos sa preventive suspension nga walay sweldo sulod sa labing taas nga unom ka bulan tungod sa mga administratibong kaso nga grave abuse of authority, gross misconduct, serious dishonesty, gross negligence, conduct prejudicial to the best interest of the service ug paglapas sa Akta Republika No. 6713 kun “Code of Conduct and Ethical Standards for Public Officials and Employees”.

Ang reklamo kalabot sa pag-isyu sa Special Permit No. 2024-09 ngadto sa Shalom Enterprises niadtong Mayo 14, 2024 alang sa desilting operation sa Mananga River atol sa kakulang sa tubig tungod sa El Niño ug nakaapekto sa Metro Cebu ug sa silingang mga lungsod.

Matud ni Deiparine nga giisyu ni Garcia ang maong permit nga wala pa makakuha og Environmental Compliance Certificate (ECC) o Certificate of Non-Coverage (CNC) gikan sa Department of Environment and Natural Resources ug wala usab mokonsulta sa ubang hingtungdan ahensiya sa gobiyerno.

Gidala ni Garcia ang kaso ngadto sa CA niadtong Mayo 7, 2025 ug nangatarongan nga ang preventive suspension order nakalapas sa Section 62(c) sa Local Government Code, Section 261(x) sa Omnibus Election Code ug Sections 15 ug 16 sa Comelec Resolution No. 11059. Niadtong Mayo 15, 2025, nipagawas ang CA og 60 ka adlaw nga temporary restraining order aron mapugngan ang pagpatuman sa suspension.

Gipasabot sa CA nga dili mahimong suspensohon ang mga piniling opisyal sa probinsiya, siyudad, lungsod ug barangay panahon sa election period kon walay sinulat nga pagtugot gikan sa Comelec.

Giila usab sa korte nga adunay exemption sa mga kaso kalabot sa Akta Republika  No. 3019 kun “Anti-Graft and Corrupt Practices Act” apan nakita niini nga walay gihisgotan sa order sa Abril 23, 2025 nga si Garcia giakusahan usab ubos sa maong balaod.

Ang korte nagkanayon nga nakahimo og grave abuse of discretion ang Ombudsman sa pagluwat sa preventive suspension order ug gideklarar nga ang order niadtong Abril 23, 2025 “invalid and without legal effect.”  (BANAT NEWS)