Unta mangga ug mani si Imee

Dihang hingpit nabuak-pulpog ang BBM-SARA Uniteam nga kanhi giumol nila: Presidente Bongbong Marcos Jr. (PBBM) ug Bise-Presidente Sara ‘Inday’ Z. Duterte panahon sa kampanya, 2022 election, nga maoy nakapadaog nilang duha via landslide votes, mipagawas dayon og video si Inday nga gi-post sa social media, diin makita nga nagkaon siyag manggang hilaw.

Ug mao kadtoy sinugdanan nga nauso ang paggamit sa diehard Duterte supporters-vloggers sa pulong ‘mangga,’ nga matud pa ni Inday, nagkahulogan og: mangga-gamit!

Namatikdan. Paghibalik sa Marcoses sa Malakanyang, daw nabutaan tungod sa kahakog sa gahom-salapi-bahandi ug wala na mahinumdom kon giunsa sila pagpangga ug pagmahal sa pamilyang Duterte. Hinunoa, mao pay nangitag mga daotang paagi nga mawala ang mga Duterte sa ilang dalan gamit ang legislative ug judicial branches nga daw nahiktan na sa executive branch, kinsa inay magpabiling ligdong-patas-malinis, nagtinabangay hinuon pagpa-impeach ni Inday sa Kongreso ug walay gyoy mipugong ni CIDG Chief Nicolas Torre III sa pagdakop-pagtugyan-paglawog ni PRRD ngadto sa banyagang International Criminal Court (ICC), The Hague, Netherlands.

Tuod, Senado mipahigayo'g Senate investigation niining maong hitabo nga gipangulohan nila Senador: Imee Marcos, Peter Cayetano ug Jinggoy Estrada, kinsa nasayod nga dakong sayop ang gihimo nilang Torre. Ug nganong wala man nila mapugngi? Nganong diha na man sila mapakitag pagpakabana, nga na-detain na si PRRD sa laing nasud?

Gipakita-gipamulong ni Imee nga wala na siya makagusto sa subrang pag-abuso sa iyang igsuong presidente. Hinungdan, mibiya siya sa Team Marcos, diin si PBBM mitangtang sab sa ngalan ni Imee diha sa iyang pagpangampanya. Tinuod kaha kining ilang gipasundayag nga away-away, o drama lamang, diin sila maayo kaayo niini?

Aron mapruyba nga si Imee para sa good governance ug tinuod ang iyang pagsaway nga ang pagka-aresto ni PRRD illegal, diin si Bongbong maoy Commander-in-Chief, dapat pangunayan ni Imee ang paghimog dinaliang aksiyon nga makapa-impeach sa iyang igsuon.

Kon mangga, mangga-gamit sa pamilyang Duterte man ang gibunyag kaniya sa mga DDS-vloggers, dapat mag-mani na siya. Oo, panahon na nga mag-mani, mani-ngil na siya ni PBBM sa dakong utang niini sa katawhan nga hangtod karon wala pa gayod mabayri. Ug maimpas lamang kini, kon si PBBM ma-impeach! Kaya ba, Sen. Imee?