Mag-inspection ta

Karong adlawa, dia ko sa Barangay Paril, Barili, Cebu kay duawon nako ang akong mga namingawang paryente.

Ikaduha nakong katuyoan sa pag-anhi sa Barili mao ang pagsusi kon unsa nay kalamboan sa proyekto sa Department of Public Works and Highways (DPWH) nga paghimo’g dugang mga karsada.

Gawas sa proyekto sa DPWH nga pagpalapad sa mga karsada gikan sa lungsod sa San Fernando paingon sa Carcar nga wa pa gyud mahuman, ang DPWH dunay gihimong bag-ong karsada sa Barili.

Kining maong karsada modugtong ni sa Barili nga anha moagi sa Barangay San Rafael ug midugtong sa karaang karsada sa barangay paingon sa Candugay.

Gikan sa taytayan sa Barangay Giloctog, Barili, nahimoan na man kini og karsada paingon sa Barangay Hilasgasan. Gikan sa Barangay Hilasgasan, mao ni karon ang gitrabaho sa DPWH aron nga modugtong kini ngadto sa lungsud sa Aloguinsan subay sa dapit nga mag-umbaw sa dagat.

Mga usa ka tuig na ang milabay, gi-inspection nako ang maong proyekto sa DPWH ug mao kini karon ang susihon nako kon unsay kalamboan sa road construction sulod sa usa ka tuig.ng

Basin og mapareho kini sa karsada nga anha kuno mag-agi sa kilid sa bukid gikan sa Naga paingon dinhi sa Cebu City nga wa gyud mahuman sulod na sa dugay’ng katuigan.

Nindot man gud nga daghang karsada nga mamugna kay makatabang kini pagsulbad sa problema sa trapiko. Ilabi na gyud kon ang DPWH maghimo og laing karsada, o kaha palapdan nila pag-ayo ang karsada gikan sa Mandaue paingon na ngadto sa Carmen.

Kining maong mga lugara sa norte nga bahin sa Sugbo maoy sagad makasinati og problema sa trapiko, unya diri sab sa south sa probinsya ang karsada gikan sa Talisay paingon na gyud ngadto sa Carcar.

* * *

Kagahapon, Biyernes, Marso 28, maoy unang adlaw sa official campaign period sa mga local candidates. Nagpasabot nga ang Comelec may katungod na sa pagdisiplina sa mga kandidato nga makahimo og salaod sa pagpangampanya.

Usa niini kining mga kandidato nga pwerteng dagkoa og mga propaganda campaign materials, sama sa mga billboards nga gipatik ang mga dagkong hulagway sa mga kandidato.

Ang Comelec dunay mga gilatid nga lagda sa gidak-on sa mga campaign posters ug billboards, ug base sa balaod silotan sa Comelec ang dili mosunod sa lagda.

Unta, tinud-on sab sa Comelec ang pagsilot sa mga malapason sa balaod, dili ka igo lang mangatarungan nga kuwang sila’g mga tawo nga maniid kinsa ang mga malapason.