Nikki, na-trauma sa nakaraan nila ni Troy

Taong 2018 nang pakasalan si Nikki Valdez ng non-showbiz account exe­cutive na si Luis Garcia. Naranasan na umanong aktres na mayroong ibang babaeng lumapit sa kanyang mister.

“Hindi naman po siya nilalandi pero I felt uncomfortable. So, I talked to him, sabi ko, “Lovey, I just wanna say something about what I witnessed today. “Baka pwede hindi ka gano’n kakomportable sa taong ‘to?” Because it made me uncomfortable and it might make other people think, or make other people uncomfortable as well, and think na Ay! May something ba sila?” naka­ngiting kwento sa amin ni Nikki sa Fast Talk with Boy Abunda.

Labing-anim na taong gulang na ngayon ang anak ng aktres sa dating asawang si Christopher Lina na si Olivia. Pagdating sa pakiki­pag-usap tungkol sa lalaki o pag-ibig ay ang mister ni Nikki ang kumakausap sa dalagita. “Si Olivia ang palaging kausap when it comes to men ay si Dada, si Luis. Siya talaga ‘yung nagbibigay ng payo sa kanya. But ako, hindi ko na kailangang sabihin. Anak, dapat ihatid ka niya dito sa bahay. Ang sa akin lang, Leave something for yourself,” paglalahad niya.

Samantala, hinding-hindi umano makalilimutan ni Nikki ang naging relasyon nila noon ni Troy Montero mahigit dalawang dekada na ang nakalilipas. Aminado ang aktres na hindi na­ging madali ang kanyang sitwasyon noong 2001. “Difficult because he was at his peak no’ng time na naging kami. From the time that it started, from the time that it ended nando’n si Tito Boy. Pinag-uusapan lang natin ‘to ha hindi para maapektuhan pa tayong lahat. During that time, it was the peak of his career. Ang daming na-shock na parang, “Huh? Bakit siya? Bakit daw ako? Umabot pa nga sa point na may reference pa sila na ang foreigner ay mahilig sa kamukha ko. May ganoon no’ng time ‘yon. That was so painful for me. Especially my family,” pagtatapat ng aktres.

Talagang na-trauma raw ang aktres dahil sa mga hindi magagandang salitang ipinukol sa kanya ng mga tao sa loob ng pitong buwang nakarelasyon si Troy. Dumating pa sa puntong ayaw nang magbasa ni Nikki ng mga balita noon. “My kuya then was in college and I remember he told me na napanood niya ‘yung isang interview sa TV na ‘yun na nga, na parang Bakit si Nikki Valdez? Ang mga foreig­ner talaga mahihilig sa mukhang ganyan. So nasaktan ‘yung kuya ko for me. Dumating talaga sa point na hindi na ako nagbabasang diyaryo, may diyaryo pa no’n. Hindi kami bumibili ng newspaper. Or kung meron man, hindi ako nag-o-open ng entertainment section. Na-trauma talaga ako,” pagdedetalye ni Nikki.

Para kay Nikki ay malaki na ang pagkakaiba ng show business noon at ngayon dahil na rin sa pagkakaroon ng social media. Hindi lubos maisip ng aktres kung ngayon niya naranasan ang mga hindi magandang nangyari noon. “Siguro kung that happened in this generation, ‘yung sinasabi nila na mental health ko, bagsak. Negative talaga kasi hindi mo alam paano uma­bot sa gano’n. Eh siyem­pre noong time na ‘yon, in love lang tayo, tao lang naman tayo. And I believe that ours is genuine kind of love,” giit ng aktres.

Taong 2003 nang maging kasintahan ni Troy si Aubrey Miles. Mayroon nang dalawang anak ang mag-asawa bago pa tuluyang magpakasal noong 2022. — Reports from JCC