MOA gipirmahan alang sa pabahay program sa Toledo

CEBU, Philippines — Usa ka tripartite memorandum of agreement (MOA) ang gipirmahan sa mga opisyal sa Department of Human Settlements and Urban Development (DHSUD), Toledo City Local Government Unit (LGU), ug Pag-IBIG Fund alang sa pagpatukod og balay sa mga taga Toledo.

Dili momenus 3,000 ka balay ang tukoron sa Brgy. Canlumampao sa maong dakbayan subay sa flagship program nga Pambansang Pabahay para sa Pilipino (#4PH) sa DSHUD paghatag og disenteng panimalay sa mga Pilipino.

Sumala sa Toledo City Information office ang maong housing project adunay lapad nga open spaces, parking lots, ug uban pa'ng mga pasilidad alang sa hamugaway nga pagpuyo sa mga molopyo.

Si Secretary Jose Rizalino Acuzar sa DHSUD nagkanayon nga ang 4PH program maoy usa sa tubag sa dugay na nga problema o hagit sa mga Pinoy nga makaangkon og kaugalingong balay.

Misaad si Toledo City Mayor Marjorie Perales nga mahatagan gyud og access ang mga taga Toledo og disente nga panimalay nga barato pa.

Saksi sa maong kalihokan niadtong Marso 14 mao ang DHSUD Undersecretaries Garry De Guzman ug Eduardo Robles Jr., Assistant Secretary Sharon Faith Paquiz ug DHSUD Regional Office 7 Director Lyndon Juntilla, uban sa mga opisyal sa DHSUD ug sa LGU sa Toledo. (BANAT NEWS)