EDITORYAL — Way oportunidad

Niadtong nakalabay nga adlaw naukay ang dakbayan sa Sugbu sa balita bahin sa inahan nga nibaligya sa anak.

Dili lang kay usa ka anak, kondili duha niya ka mga anak.

Ang kamanghuran nga masuso ug ang gisundan niini. Wala hinuon masuta kun babaye o lalaki ang mga masuso nga iyang gibaligya.

Ikapito ug ang ikawalo niya kining mga anak. Daghan gyud iyang mga anak ug walay klaro ang ilang panginabuhian sa iyang bana.

Gipalit og P20,000 ang ikapito ug P30,000 sab ang ikawalo. Ingon ana ra kabarato, mas mahal pa ang mga iro, kabayo o unsa pa nang imported nga pets sa mga adunahang tawo.

Ang rason matud pa , ang halin maoy ilang gigamit aron makapalit sa ilang gikinahanglan.

Maayo nalang nga dunay anak niini nga gipalitan og celphone nanabi sa mga silingan sa gibuhat sa ilang inahan.

Kaning kakabus, kakulang sa oportunidad nga makapanginabuhi og mokita og paigo sa panginahanglan sa pamilya.

Kakuwang  sa mga serbisyo ug seryusong pag-atiman sa gobiyerno sa mga panginahanglan sa  mga kabus, impormasyon ug edukasyon maoy nagtukmod sa uban nga mohimo og mga ilegal aron mabuhi.

Mao unta kini ang atimanon sa mga naa sa gobiyerno.