Ayaw dugangi ang problema

Inay makatabang, posible na hinuon nga ang ubang mga supporters ni kanhi presidente Rodrigo Duterte maoy mahimong hinungdan nganong di siya kahatagan sa gitinguha nga “interim release” ug katugotan nga makagawas sa prisohan samtang husayon ang iyang kaso didto sa International Criminal Court.

Kini maoy pasidaan sa batid sa international law ug accredited sa ICC nga si Atty. Joel Butuyan atol sa usa ka forum nga gipasiugdahan sa Foreign Correspondent Association of the Philippines (FOCAP).

Matud ni Butuyan nga ang gihimo sa ubang mga dumadapig ni Duterte nga pagpakatap og mga mini nga kasayuran maghatag ni og di maayong signal ngadto sa mga huwis sa ICC nga maoy mohukom hatagan ba o dili sa gipangayo nga interim release si Duterte.

Ang pagpakatap og “fake news” ug uban pa nga content diha sa social media sama sa pagpanaot lakip sa mga huwes sa ICC makahatag og impression sa mga huwes nga labihan ka gamhanan sa kanhi president nga mamahimo niining manipulahon ang mga impormasyon.

Ang pagpanghasi sa mga supporter ni Duterte ngadto sa mga supak sa mga paagi sa kanhi administrasyon dili makatabang niya.  Sigun sa report, human sa initial appearance ni Duterte didto sa ICC nahimo dayong target sa mga trolls ang social media accounts sa ICC Judge nga si Julia Motoc.

Matud ni Butuyan nga kun pasagdan sa mga Duterte nga magpadayon ang gihimo sa ilang mga dumadapig mas dako ang kadaot nga mahimo niini sa iyang depensa kay sa tabang mga mahimo.

Gipahinumduman ni Butuyan nga mas lugak ang mga lagda sa ICC pagdawat og mga ebidensiya kun itandi sa atong korte dinhi sa Pilipinas. Matud niya nga ang mga kasayuran nga makuha diha sa internet mahimong dawaton isip ebidensiya didto sa ICC.

Dili sab bitaw husto nga manipulahon ang mga kasayuran aron itakdo sa ilang gusto nga mahitabo. Ug dili ni makiangayon alang sa kanhi presidente nga nagsakripisyo sa iyang kaugalingon.

Kun buot gyud motabang sa iyang mga supporters, igo na ang pagpahigayon og malinawon nga prayer rally.  Igo na ang pag-ampo nga giyahan ang iyang legal panel nga maoy modepensa niya didto sa ICC sa mga kasong iyang giatubang.

Mosugot ug sa dili ang mga dumadapig sa kanhi presidente, dili madaog ang mga kasong giatubang karon ni Duterte pinaagi sa social media.

Legal ni nga proseso nga ang iyang mga abogado maoy may katakos sa pagpanalipod sa iyang katungod. Busa ayaw na dugangi ang problema nga giatubang karon sa kanhi presidente.