Marcial vs Huerta sa Sept. 19

MANILA, Philippines — Muling aakyat ng bo­xing ring si middleweight contender Eumir Felix Marcial para sa kanyang pang-walong professional fight sa Setyembre 19 sa San Diego, California.

Dahil dito ay hindi makakalaban ang 2022 Tokyo Olympic Games bronze medalist sa para­ting na 20th Asian Games sa Aichi-Nagoya, Japan sa susunod na buwan.

Nakatakda ang boxing preliminary rounds ng Aichi-Nagoya Asiad sa Setyembre 21 kasunod ang semifinals sa Setyembre 29 at 30 at ang gold medal bouts sa Oktubre 2.

Kaya imposible nang makasali ang 30-anyos na tubong Zamboanga City sa quadrennial event.

Nauna nang inilista ang pangalan ni Marcial sa official lineup ng Philippine boxing team sa Aichi-Nagoya Asiad kasama sina 2022 Tokyo silver medal winners Nesthy Petecio at Carlo Paalam at 2024 Paris bronze medalist Aira Villegas.

Kung hindi lalaban si Marcial sa Aichi-Nagoya Asiad ay si pro fighter Weljon Mindoro ang ipapalit ng Association of Boxing Alliances in the Philippines (ABAP).

 Haharapin ni Marcial, may 7-0-0 win-loss-draw ring record kasama ang apat na knockouts, si American Omar Ulises Huerta sa Setyembre 19 sa San Diego.

Ipinag-utos ng World Boxing Council (WBC) kay Marcial na idepensa ang kanyang suot na international middleweight title.

Huli kasing lumaban si Marcial sa ‘Thrilla in Manila’ 50th Anniversary noong Oktubre 29, 2025 kung saan niya tinalo si Eddy Colmenares via majority decision.