Cebu Greats mamawi Apan mosagubang og malisud nga tahas vs Caloocan

CEBU, Philippines — Ang Cebu Greats naglaraw nga mamawi sa miagi nilang mapait nga kaparotan sa dihang ilang sangkaon ang Victory Liner Caloocan Batang Kankaloo sa SportsPlus Maharlika Pilipinas Basketball League (MPBL) Season 8 karong adlawa (Sabado, Hulyo 18) sa Cebu Coliseum.

Magsugod ang ilang kumbati sa alas-8 sa gabii human sa alas-5 sa hapon nga pasiunang engkwentro tali sa Mindoro Tamaraws ug Zamboanga Sikat.

Ang Greats nasugamak sa mga kamot sa Biñan Tatak Gel, 78-77, sa miaging duha ka gabii didto sa Hoops Dome sa dakbayan sa Lapu-Lapu.

Human napapha ang otso puntos nilang labaw sa pinal nga singko minutos, ang Greats dunay daghang mga tsansa nga modaog apan si Kint Ariar nasipyat sa krusyal niyang  3-pointer ug dayon sa libre kaayo niyang mid-range shot sa nahibilin nga 0.4 segundos nga nagsilyo sa ilang kapalaran. Ang Cebu natagak sa 14-4 human giputol sa Biñan ang pito nila ka sagunson nga daog.

"Natalo man kami pero nakakataba ng puso na makita na ganito ang suporta ng mga Cebuanos sa aming team," matud pa ni Cebu team owner Samson Lato. "Sana makabawi kami this Saturday. Malakas din ang kalaban pero pipilitin namin na makabawi."

Si Jun Manzo, nga maoy nangu sa Cebu uban ang 23 puntos, mipaambit og susamang sentimento.

"Hindi ito ang resulta na gusto namin, pero taos-puso kaming nagpapasalamat sa bawat taga-Cebu na sumuporta at nagbigay ng lakas sa amin. Hindi kami titigil na lumaban. Bawi ta, Cebu Greats!" suwat pa ni Manzo sa iyang Facebook. Ang Greats mosagubang og malisud nga tahas sa ilang tinguha nga makabangon gikan sa ilang pagkahagba gumikan kay pader man ang ilang banggaon nga Batang Kankaloo, ang lider sa North Division nga nagkupot og 15-2 rekord.

Ang Caloocan, nga gikan sa 111-90 nga paglampornas sa Imus Yangkee niadtong Hulyo 13, magsandig nilang Kean Baclaan, Kymani Ladi, Eric Camson, Jeff Manday, Dominic Escobar, Jammer Jamito, Jhygruz Vence Laude, Paul Hendrix Casin, Irven Palencia, ug Joseph Manlangit.

Gawas nilang Manzo ug Ariar, ang Cebu makalaum sab nilang Mark Meneses, Simon Camacho, Dhon Reverente, Al Francis Tamsi, Bombom Tampus, Wowie Escocio, Dondon Hontiveros, JR Quiñahan, ug Elmer Eccahez sa dihang mosuway sila pagregalo og tam-is nga kadaogan sa lunod-patay nilang mga dumadapig.