Tinedyer, chatbot ang kausap, hindi tao

Lumabas sa isang survey na may mga tinedyer na lubhang nahuhumaling sa mga chatbot tulad ng ChatGPT, Gemini, Claude at iba pa. Lagi nila itong kausap, nagsisilbing tagapayo, kaibigan at kasama sa mga panahon ng kalungkutan o kaibiguan.

Lagi kasing available ang chatbot. Hindi ito napapagod, hindi naiinip at hindi kailangang hintayin bago sumagot. ­Maaaring kausapin ng isang tinedyer ang AI sa gabi, madaling-araw o anumang oras na may problema siya, basta may cellphone, computer o ibang gadget na nakakonekta sa internet.

Kapag malungkot, nabigo, nag-aalala o may problemang ayaw niyang sabihin sa ibang tao,  madali para sa kanya na i-type na lamang ang kanyang nararamdaman sa chatbot. Hindi rin siya kailangang humarap sa mukha ng isang tao na maaaring manghusga, manisi o pagtawanan siya.

Dito nagsisimula ang problema. Ang chatbot ay makina, hindi tao. Maaari itong makagawa ng sagot na mukhang maunawain, mahabagin at personal, ngunit wala itong sariling damdamin at karanasan ng tao. Gumagawa ito ng mga tugon batay sa mga pattern na natutuhan mula sa napakaraming halimbawa ng wika. Dahil dito, maaaring maging kapani-paniwala ang sagot kahit mali, kulang o hindi angkop sa tunay na kalagayan ng gumagamit.

Hindi lahat ng ginagawa ng chatbot ay masama. Malaki ang pakinabang ng AI sa pag-aaral, pananaliksik, pagsusulat, pagbuo ng ideya at iba pang gawain. Ang problema ay kapag napapalitan nito ang mga taong dapat sana ay kinakausap ng isang tinedyer—magulang, kapatid, kamag-anak, guro, kaibigan o iba pang mapagkakatiwalaang tao.

Mas mabuting alamin muna sa tinedyer kung paano niya ginagamit ang chatbot. Kausapin siya nang mahinahon. Usisain kung ano ang mga itinatanong niya sa chatbot, bakit niya ito ginagamit at ano ang pakiramdam niya pagkatapos makipag-usap dito. Huwag agad siyang husgahan o pagalitan, dahil maaari lamang siyang matutong ilihim ang kanyang paggamit ng AI.

Pansinin kung mas pinipili na niyang kausapin ang AI kaysa sa mga taong malapit sa kanya, kung halos lahat ng problema ay sa chatbot na lamang ipinagtatapat, o kung nahihirapan siyang bawasan ang oras ng pakikipag-usap dito.

Mahalaga ring ituro sa tinedyer na ang pagiging magalang, maalalahanin at tila mapagmahal ng chatbot ay hindi katumbas ng tunay na pagkakaibigan. Ang AI ay maaaring gayahin ang paraan ng pakikipag-usap ng isang taong nakikinig at nakikiramay, ngunit hindi nito nararanasan ang buhay ng isang tao. Maaari rin itong magkamali at makapagbigay ng impormasyong tila tama ngunit hindi pala totoo.

Hindi mapapalitan ng chatbot ang isang magulang na handang makinig, isang kaibigang tunay na nakauunawa o isang gurong maaaring gumabay. Ang teknolohiya ay maaaring makatulong sa isang tinedyer, ngunit ang tunay na pakikipag-ugnayan sa kapwa tao pa rin ang mahalagang pundasyon ng kanyang paglaki, emosyonal na katatagan at kaligtasan.

••••

Email- [email protected]