Pasukan 2026–2027 - Handa na ba talaga?

MALAPIT na naman ang pasukan. Habang abala ang mga magulang sa pagbili ng gamit at paghahanda ng baon, paulit-ulit namang bumabalik ang mga problemang matagal nang hindi lubos na nasosolusyunan. Kakulangan sa silid-aralan, kulang na silya, at mga estudyanteng nagsisiksikan sa masisikip na classroom.

Dagdag pa rito ang tag-ulan na kasabay ng pagbubukas ng klase. Kapag bumuhos ang malakas na ulan, baha ang unang sumasalubong sa maraming estudyante. Basa ang sapatos, putik ang daan, at minsan ay napipilitang lumiban dahil sa panganib ng pagbiyahe.

Hindi rin mawawala ang banta ng iba’t ibang sakit gaya ng trangkaso, ubo, sipon, dengue, at iba pang karaniwang sakit na mabilis kumalat kapag siksikan at kulang sa maayos na pasilidad. Ang edukasyon ay karapatan ng bawat bata, ngunit paano sila makakapag-aral nang maayos kung ang mga pangunahing pangangailangan sa paaralan ay nananatiling problema taun-taon?

Pasukan na naman. Ang tanong ng marami: hanggang kailan magiging normal ang mga suliraning ito?

Disclaimer:  Ang pahayag na ito ay opinyon at obserbasyon lamang batay sa mga karaniwang hamon tuwing panahon ng pasukan. Hindi ito naglalayong manira o magbigay ng maling impormasyon laban sa anumang institusyon o ahensya.