Hahabulin ba sa inutang ng iba?

Dear Attorney,

Apat kaming umutang para sa itatayo naming store. Magkakasosyo po kami. Ang tanong ko, puwede ba akong habulin sa halagang inutang ng mga kasamahan ko? Magkakaiba ang halaga ng inutang namin. Mas malalaki po ang mga hiniram nila kaysa sa akin. — Maria

Dear Maria,

Depende iyan sa kontrata na pinirmahan n’yo noong nangutang kayo. Ipagpapalagay ko na nakapaloob ang pag-utang n’yong apat sa iisang kontrata kaya ka nagtatanong kung maari ka bang singilin para sa mga halagang hiniram ng mga kasama mo. Basahin mo ang naging kasunduan niyo ng lender at tingnan mo kung ang mga katagang “solidarily liable” o “jointly and severally liable” ay makikita sa kontrata. Kung mayroon kasing “solidarily liable” o “jointly and severally liable” sa kasunduan, malamang na maari kang habulin ng lender para sa inutang ng iyong kaibigan.

Madalas ay ang mga katagang “solidarily liable” o “jointly and severally liable” ang ginagamit upang isaad na maaring habulin ang kahit isa lamang sa mga nakapirma sa kasunduan upang siyang papanagutin at pagbayarin para sa kabuuang halaga ng inutang. Kung wala naman ang mga katagang nabanggit ay maaring hindi ka pagbayarin ng buong halaga ng inutang dahil upang ikaw ay mahabol para sa kabuuang halaga ng utang, kailangang tahasang nakalagay ito sa kontrata. Hindi kasi agarang ipagpapalagay na may solidary liability pagdating sa mga obligasyon o pananagutan.

May solidary liability lamang kung tahasan itong nakalagay sa kontrata katulad ng sinabi ko; kung ito ay itinakda ng batas; o kung iyon ang likas na katangian ng nasabing obligasyon. Wala ka namang nabanggit para masabing itinakda ng batas o kaya’y likas sa kasunduan niyo ang pagkakaroon niyo ng solidary liability para sa inutang niyo. Ibig sabihin, kung walang sinasabi ang kontrata niyo ukol sa solidary liability ay hindi ka maaring papanagutin para sa mga obligasyon ng mga kasama mo.