Ang marangal na pinuno

SI Nelson Mandela ay isa sa mga pinunong hinangaan sa buong mundo dahil sa kanyang katapatan, kababaang-loob, at malasakit sa mamamayan. Bago siya naging pangulo ng South Africa, nakulong siya nang dalawampu’t pitong taon dahil sa pakikipaglaban niya laban sa diskriminasyon at hindi pagkakapantay-pantay ng mga tao.

Pagkalaya niya sa bilangguan, marami ang nag-isip na maghihiganti siya sa mga taong umapi sa kanya. Ngunit kabaligtaran ang kanyang ginawa. Sa halip na magtanim ng galit, pinili niyang pairalin ang kapayapaan at pagkakaisa. Naniniwala si Mandela na ang tunay na lider ay hindi gumagamit ng kapangyarihan upang maghiganti kundi upang maglingkod at magbigay ng pag-asa sa bayan.

May isang pagkakataon na tinanong siya kung paano niya nagawang patawarin ang kanyang mga kalaban matapos ang mahabang panahon ng pagdurusa. Sumagot siya na kung dala pa rin niya ang galit habang lumalabas sa bilangguan, para na rin siyang nananatiling bihag. Ipinakita niya na ang isang mabuting pinuno ay marunong magpigil ng damdamin alang-alang sa ikabubuti ng nakararami.

Dahil sa kanyang magandang pamumuno, naging simbolo si Nelson Mandela ng kapa­yapaan at pagkakaisa. Pinatunayan niya na ang tunay na kadakilaan ng isang lider ay hindi nasusukat sa kapangyarihan kundi sa kabutihan ng kanyang puso at sa paglilingkod niya sa bayan.

Hanggang ngayon, marami pa ring tao ang humahanga sa kanyang ipinakitang katangian bilang isang marangal at tapat na pinuno. Isa siyang paalala na ang tunay na lider ay marunong magpakumbaba, magpatawad, at magsakripisyo para sa kapakanan ng iba.

“A good head and a good heart are always a formidable combination.” – Nelson Mandela